|
A
desfeita do Xallas
| Central Unitaria de Trabajadores |
Logo de que a Central Unitaria de Traballadores (CUT)
informase o pasado luns de que os responsables da desfeita ecolóxica
do encoro da Fervenza eran altos cargos da Consellería de Medio
Ambiente que, a pesares de coñecer os dados de ocupación do encoro,
fixeran oídos xordos. Veñen de sucederse declaracións en medios
de comunicación que non fan outra cousa que deixarnos perplexos
ante o cinismo das mesmas.
Así, á CUT lle parecería risible senón fose triste, que o Sr. Delegado
Provincial de Medio Ambiente da Coruña, o Sr. D. Manuel Tajes, faga
balance dun tremendo desastre ambiental en quilos de peixe e medidas,
como se non se tratase máis que dunha poxa na lonxa. Estas declaracións
amosan o total descoñecemento sobre a biodiversidade e o medio natural
que ten unha persoa que dirixe as actuacións da Consellería de Medio
Ambiente na Provincia da Coruña, nunha desfeita ecolóxica sen precedentes
e da que o río Xallas non se recuperará en moitos anos.
O Sr. Delegado Provincial xa nos tiña acostumados aos traballadores
de Medio Ambiente, a escorre-lo vulto ante os problemas laborais
que cada día aumentan por unha falla de diálogo, que entendíamos
como unha actitude pola súa banda, pero que agora, ante o caracter
pueril das súas declaracións públicas, entendemos máis como un síntoma
de ineptitude para afrontar calquera problema. Por outra banda,
as declaracións do Sr. Santiso, Secretario Xeral da Consellería
de Medio Ambiente e Presidente de Augas de Galicia, son inauditas.
Di o Sr. Santiso ante os medios de comunicación que a empresa non
“avisou” á Consellería do nivel de auga do encoro, nin que a pesares
da seca variou (reduciu segundo as súas palabras) o nivel do caudal
ecolóxico. Ante estás abraiantes declaracións, dende a CUT lle rogamos
ao máximo responsable de Augas de Galicia que revise de cando en
vez os dados facilitados ao seu departamento e que se informe sobre
o que di a lei de pesca fluvial sobre o caudal ecolóxico.
Dende a CUT non vamos a repetir outra vez os dados que recolle a
web de Augas de Galicia, onde o día 5 de novembro aparecía o encoro
coa máis que alarmante cifra do 1,03% de ocupación (cifra que coñecía
Augas de Galicia), pero si lle vamos a lembrar ao Sr. Santiso que
a empresa non pode variar o caudal ecolóxico baixo unha sanción
que pode chegar aos 50.000.000 das antigas ptas. No momento que
suceden os feitos, o caudal ecolóxico marcado para ese encoro era
de 1,367m3/s e o aporte de auga que chegaba do río era de 0,36m3/s
algo que, sen coñecer moito as matemáticas, indicaba claramente
que o cauce da Fervenza ía secar por completo, sen que a empresa,
por moito que quixese, puidera facer algo por remedialo sen cometer
unha infracción, cualificada como moi grave, pola lei de pesca fluvial.
A solución ao problema estaba nas mans da Consellería de Medio Ambiente,
que neste caso mirou para outro lado ate que os feitos saltaron
aos medios de comunicación.
Na CUT estamos acostumados a que, tanto o Sr. Tajes como o Sr. Santiso,
tenten escorre-lo vulto. Dende que o Sr. D. Jorge Santiso foi nomeado
Secretario Xeral da Consellería négase a dialogar cos representantes
lexítimos dos traballadores, e incluso iniciou unha persecución
sindical na que dous traballadores foron expedientados, por orde
directa del, baixo ameaza de despido, polo que consideramos que
tras este desagradable incidente e da sucesión de falsidades e medias
verdades contadas á opinión pública, tanto o Sr. Santiso como o
Sr. Tajes, deberan ter un pouco da dignidade que lle negan aos demais,
e presentar a súa dimisión.
14/11/07
|
