| DOCUMENTOS |
|
Proposta
de Código Deontológico da
Profesión Xornalísticas
de Galicia (CPXG)
|
Proposta
de Código Deontolóxico da Profesión Xornalística
en Galicia O Colexio Profesional de Xornalistas
de Galicia (CPXG) presentou unha primeira
proposta de Código Deontolóxico da Profesión
Xornalística en Galicia. É un texto para
ler e reflexionar e tamén para aportar suxestións
ou propostas que o complementen ou melloren.
Para iso, o borrador será enviado a todos
os colexiados/as, que poden mandar as súas
achegas ó CPXG por correo electrónico, fax
ou correo ordinario. Xornal.com publica
o texto íntegro e abre tamén os seus foros
de debate. O CPXG dedicará ó cometido das
novas propostas o tempo que resta ata final
de 2002. O texto modificado por esas aportacións
será sometido, xa no 2003, á aprobación
da asemblea xeral ordinaria. O Colexio Profesional
de Xornalistas de Galicia ten o deber de
elaborar un Código de referencia que obrigue
ós/ás profesionais e ás empresas da comunicación.
INTRODUCCIÓN.-A liberdade de expresión e
o dereito á información son dous fundamentos
substanciais da sociedade democrática. Os
dous son dereitos recollidos e amparados
pola Constitución. Do vigor, o respecto
e a plena vixencia destes principios depende
a existencia dunha opinión pública plural
e independente, requisito indispensable
para o bo desenvolvemento da vida pública
e a plenitude do sistema democrático. A
garantía dos dereitos dos cidadáns require
a defensa duns
MEDIOS DE COMUNICACIÓN libres, plurais,
críticos e abertos á sociedade á que serven.
A importancia da función social que presta
o xornalista a través dos medios de comunicación,
como elemento principal para o exercicio
destes dereitos, esixe salvagardar permanentemente
estes principios de calquera intento de
restricción ou coacción procedente de toda
forma de poder, así coma da súa posible
degradación, producida pola súa eventual
inobservancia ou adulteración por parte
dos propios medios ou de quen traballa neles.
Na súa condición de actores principais do
exercicio dun dereito fundamental, do que
son depositarios tódolos cidadáns, os profesionais
da información deben desenvolve-la súa función
atendendo ó dobre compromiso da responsabilidade,
derivada da súa importante tarefa e do mandado
da súa propia conciencia, dacordo co ordenamento
constitucional e cos principios deontolóxicos
da profesión xornalística. Para manter con
plenitude estes principios, o xornalista
debe defender e aplicar rigorosamente as
normas nas que asenta a súa actividade,
atendendo ós seguintes
CRITERIOS 1. Observar sempre unha clara
distinción entre feitos e opinións ou interpretacións,
evitando toda confusión ou distorsión deliberada
de ámbalas dúas, así como a difusión de
suposicións e rumores.
2. Difundir únicamente informacións fundamentadas,
evitando en calquera caso afirmacións ou
datos imprecisos e sen base dabondo, que
poidan lesionar ou menospreza-la dignidade
das persoas e provocar un dano ou descrédito
inxustificados a institucións e entidades
públicas e privadas, así como a utilización
de expresións ou cualificativos inxuriosos.
3. Rectificar con dilixencia e con tratamento
adecuado á circunstancia, as informacións
e as opinións que delas deriven, que estean
probadas como falsas e que, por este motivo,
resulten perxudiciais para os dereitos e
intereses lexítimos das persoas e/ou organismos
afectados, sen eludir, se fose preciso,
a disculpa, con independencia do que as
leis dispoñan ó respecto.
4. Utilizar métodos dignos para obter información
ou imaxes, sen recorrer a procedementos
ilícitos.
5. Respecta-lo off the record cando éste
fose expresamente invocado, conforme coa
práctica usual desta norma nunha sociedade
libre.
6. Recoñecer ás persoas individuais e/ou
xurídicas o seu dereito a non proporcionar
informacións nin responder preguntas, sen
perxuízo do deber dos xornalistas de atende-Io
dereito dos cidadáns á información. Canto
a asuntos relacionados coas administracións
públicas, o dereito fundamental á información
debe prevalecer sempre por riba de calquera
restricción que vulnere inxustificadamente
o principio da transparencia informativa
á que estean obrigadas.
7. Non aceptar nunca retribucións ou gratificacións
de terceiros, por promover, orientar, influir
ou ter publicado informacións ou opinións.
En todo caso, non se simultaneará o exercicio
da actividade xornalística con outras actividades
profesionais incompatibles coa deontoloxía
da información, como a publicidade, as relacións
públicas e as asesorías de imaxe, sexa no
ámbito das institucións ou organismos públicos,
coma en actividades privadas.
8. Non utilizar nunca en beneficio propio
informacións privilexiadas, obtidas de forma
confidencial, como xornalistas, no exercicio
da súa función informativa.
9. Respecta-lo dereito das persoas á súa
propia intimidade e imaxe, especialmente
en casos ou acontecementos que xeren situacións
de aflicción ou dor, evitando a intromisión
gratuíta e as especulacións innecesarias
sobre os seus sentimentos e circunstancias,
especialmente cando as persoas afectadas
o expliciten.
10. Observar escrupulosamente o principio
de presunción de inocencia nas informacións
e opinións relativas a causas ou procedimentos
penais en curso.
11. Tratar con especial tino toda información
que lles afecte a menores, evitando difundi-Ia
súa identificación cando aparezan como víctimas
(agás no suposto de homicidio), testemuñas
ou inculpados en causas criminais, sobre
todo en asuntos de especial trascendencia
social, como é o caso dos delictos sexuais.
Tamén se evitará identificar contra da súa
vontade ás persoas próximas ou parentes
inocentes de acusados ou convictos en procedementos
penais.
12. Actuar con especial responsabilidade
e rigor no caso de informacións ou opinións
con contidos que poidan suscitar discriminacións
por razóns de sexo, raza, crenza ou extracción
social e cultural, así como incitar ó uso
da violencia, evitando expresións ou testemuños
vexatorios ou lesivos para a condición persoal
dos indivíduos e a súa integridade física
e moral.
DECLARACIÓN FINAL Os xornalistas teñen que
dispor dos medios e instrumentos imprescindibles
para poderen desenvolve-la súa actividade
con plena independencia, liberdade, iniciativa
e sentido da responsabilidade, tanto no
que se refira ó ambito profesional coma
ó estrictamente laboral. Neste senso, e
para a plena garantía dos seus dereitos
individuais e do seu compromiso diante dos
cidadáns, os profesionais da información
deberán estar amparados pola cláusula de
conciencia e o segredo profesional, dentro
do marco das leis, tal como recolle a vixente
Constitución. Ademáis, consideramos necesario
o establecemento dos estatutos de redacción,
como instrumento máis axeitado para acouta-los
seus dereitos e deberes nas empresas, e
para conseguir, en última instancia, unha
maior transparencia no exercicio da súa
función diante dos cidadáns. As entidades
e organizacións profesionais representativas
deberán velar pola boa imaxe da profesión
xornalística, procurando evita-las prácticas
abusivas e corruptas que contraveñan os
principios elementais da ética do xornalismo,
así como os intentos de limita-lo dereito
dos cidadáns á liberdade de expresión e
de información, mediante actos ou opinións
dirixidos a restrinxir ou influir lesivamente
na libre actividade dos medios de comunicación
e de quen traballan neles. De cara a unha
mellor e máis fiel realización desta tarefa,
habería que considera-la constitución dun
organismo arbitral, representativo, plural
e independente dos poderes públicos que,
sen esquece-los dereitos constitucionais
que lles asisten ós particulares e ás empresas,
e á marxe das atribucións dos órganos xudiciais,
atendese, de forma permanente, esta función.
Enlaces relacionados Su opinión Artículos
de la misma temática Artículos de la misma
fecha Publique su opinión sobre este tema
Lea las opiniones de otras personas © Xornal
Galinet S.A. El primer diario electrónico
de Galicia se edita en A Coruña (España,
UE). Avenida Ronda de Outeiro, 421, 1ºB.
A Coruña.
xornal.com 21/11/02. |
|
|
