Máis de 2.600 millóns para rematar co desequilibrio entre a costa e o interior de Galicia

noticiasgalicia.com/F. Jardón.- Na comunidade galega preséntase unha preocupante situación de desequilibrio entre a zona costeira e a interior. Esta última ven sufrindo un proceso de despoboación que lle supón un menor nivel de desenvolvemento económico, o que lle provocou unha perda do 27,4 % da súa poboación dende o ano 1981.

Entre os anos 2000 e 2006 esta situación estaba sendo paliada con fondos procedentes da Unión Europea pero ante a finalización do periodo a Consellería de Economía e Facenda decidiu poñer en marcha un Plan de Reequilibrio Territorial que abarcase a etapa 2007-2010.

O programa, que prevé unha inversión total de máis de 2.600 millóns de euros, afectará a un total de 1.037.771 galegos. Isto suporá un 38% da poboación galega, unha cifra modesta se consideramos que estes habitantes ocupan o 88,3% do territorio da comunidade. Estas cantidades dan como resultado un total de 2.576 euros por persoa.

O Plan de Reequilibrio Territorial ten como finalidade lograr un equilibro económico de Galicia impulsando o desenvolvemento sostible que axude a corrixir os desequilibrios internos a partir dun proceso de dinamización económica e a coordinación das actuacións entre todas as consellerías.

O total da superficie na que se actuará dividirase en catro zonas cun volume de poboación semellante, e contará con 25 núcleos dinamizadores que levarán a cabo máis de 500 actuacións concretas. A estratexia dinamizadora apoiarase en 25 municipios que exercerán unha forza impulsora sobre os lugares do seu arredor, conseguindo así unha maior atracción de renda, poboación, negocios e industria.

No tocante ás inversións, estas estarán repartidas en diferentes ámbitos sectoriais que contarán con programas de actuación específicos. Potenciaranse as infraestruturas produtivas, o coidado do medio ambiente, os equipamentos sociais, a vivenda, o medio rural, a pesca e a promoción económica. No reparto dos investimentos destaca unha concentración dos mesmos en infraestruturas produtivas e na promoción económica, que suman un 55% do total.

CARACTERÍSTICAS DAS ZONAS DO PLAN DE REEQUILIBRIO TERRITORIAL