noticiasgalicia.- Pouco máis de un mes despois de aprobar no Parlamento os Presupostos Xerais da Comunidade Autónoma para o ano 2008, a Xunta presentou hoxe na Cámara unha emenda á totalidade da súa política económica, recoñecendo explicitamente que o PPdeG estaba no certo cando advertía que esas contas públicas non se axustan á realidade nin recollían os instrumentos axeitados para combater a crise económica que xa afecta de cheo ás familias galegas. É a conclusión do portavoz parlamentario do PPdeG, Manuel Ruiz Rivas, despois de escoitar a comparecencia na que o conselleiro de Economía explicou as supostas medidas que a Xunta vai aplicar para tratar de combater as crecentes inclemencias económicas que se aveciñan.

A xuízo do parlamentario popular, a comparecencia de hoxe supón un recoñecemento explícito da "soberbia e a prepotencia coa que ven actuando o Goberno de Touriño en materia económica, onde non escoita a ninguén". Tamén advertiu que "non poden vostedes vivir da inercia do que deixou o Goberno do Partido Popular, porque a herdanza non vai durar para sempre se non se administra como é debido".

Para superar esta situación, e desde unha postura alonxada de calquera alarmismo, Ruiz Rivas convidou a socialistas e nacionalistas a reelaborar e consensuar un novo documento orzamentario, axustado á previsión real de crecemento, moi por debaixo do 3,5% contemplado nos presupostos en vigor, e cun maior rigor na previsión de ingresos, unha vez constatado o descenso do consumo, o incremento do paro, e a parálise do sector da construción, entre outros factores. De ser así, o PPdeG estaría disposto a apoiar os novos presupostos no Parlamento a través do procedemento de lectura única.

Na súa intervención Ruiz Rivas recordou que a Xunta mantén un dobre discurso en materia económica; mentres trata de negar a evidencia argumentando que a economía galega dispón dun "plus de resistencia" fronte á crise, uns días dí que hai que axustar o crecemento económico e outros que a Comunidade segue medrando máis que Europa.

Paralelamente, Ruiz Rivas lamentou que a aplicación de medidas como a lei do litoral, a parálise na tramitacións dos diferentes instrumentos urbanísticos promovidos polos concellos que impide dispoñer de solo para construír, a ausencia de iniciativas autonómicas para executar vivenda protexida, a parálise no solo industrial, que obriga ás empresas a buscar superficie industrial abundante e barata en Portugal ou a anulación do Plan Acuícola que expulsou de Galicia investimentos multimillonarios como o que Pescanova ía acometer en Cabo Touriñán (Muxía) contribúa a incrementar a incerteza que pendura sobre a economía de Galicia.