Caixa
Galicia consegue asociar as novas tecnoloxías en Call Center ao idioma
galego
noticiasgalicia.14/05/06.-
Caixa
Galicia, a raíz dun proxecto de desenvolvemento propio, vén de implantar
na súa Banca Telefónica unha nova tecnoloxía baseada no recoñecemento
de voz de linguaxe natural para a realización de consultas e operacións
de maneira automatizada por parte dos seus clientes.
Este ambicioso proxecto componse de dúas partes:
O TTS (Text To Speech), un sistema para a conversión de texto en fala,
o que permitirá introducir de maneira semi-automática calquera nova
función ou ítem nos servizos telefónicos da Entidade galega. Ademais,
foi preciso desenvolver unha nova voz, modificala e adaptala aos requisitos
particulares do uso da lingua galega. … O ASR (Automatic Speech Recognition),
unha ferramenta para o recoñecemento da fala que parte da definición
dun sistema de unidades fonéticas seleccionadas segundo os criterios
estatísticos e acústicos. Ata o momento, estas tecnoloxías estaban
dispoñibles en varios idiomas (como castelán e catalán), pero non
en galego.
Por este motivo, Caixa Galicia iniciou un proxecto en 2007 para incorporar
a lingua galega. No proxecto, contouse coa colaboración da empresa
tecnolóxica Tecnocom, a compañía especializada en servizos telefónicos
Loquendo, as Universidades de Santiago de Compostela e Vigo, o Instituto
da Lingua Galega e a Consellería de Innovación a través da Dirección
Xeral de I+D+i. Grazas ao desenvolvemento desta tecnoloxía, outras
empresas ou organismos poderán adquirila para o seu emprego en páxinas
webs, portais de voz, Gps, etc.
A implantación deste novo sistema permitirá un tratamento máis eficaz
e personalizado das necesidades do cliente xestionadas a través do
servizo de Banca Telefónica, perseguindo como obxectivo final que
os clientes de Caixa Galicia poidan emitir unha instrución ou consulta
ao servizo automático empregando a súa maneira habitual de comunicarse.
Dada a complexidade do proxecto, procederase a unha implantación por
fases, de maneira que se poidan realizar os axustes e procesos de
afinación precisos no sistema do recoñecedor de voz.
Dende o 5 de maio, funcionarán a través do novo sistema dous grupos
de operacións:
A consulta do saldo e os movementos de tarxetas e a recarga a móbiles,
que agora se poderá realizar a través do novo sistema automático.
Ordes de pago a móbiles, que ofrece a posibilidade de enviar diñeiro
de forma instantánea a un móbil. En xuño aplicarase a nova tecnoloxía
ao conxunto da banca telefónica de Caixa Galicia e en setembro implantarase
o servizo en galego.
A Banca Telefónica de Caixa Galicia articúlase a través da tarxeta
Caixa Activa e lánzase no ano 1998. Na actualidade conta con máis
de 100.000 usuarios que realizan mensualmente unha media de 400.000
operacións e consultas o que supón, xunto ao servizo de banca electrónica,
máis do 25% do total das transaccións de clientes da Entidade galega.
Arredor do 15% das chamadas recibidas na súa banca telefónica realízanse
en galego. Con este proxecto, a entidade completa a súa gama de servizos
electrónicos dispoñibles en galego, como son a maioría dos seus sitios
web, a súa banca electrónica de particulares, Caixa Activa, a de empresas
Caixa Xestión, a súa banca móbil Activa Móbil e a súa pasarela de
pagos para comercio electrónico. |
|
