A Fundación Caixa Galicia estreará sede en Ourense

noticiasgalicia.09/07/08-Caixa Galicia asinou a adquisición do edificio que albergou o Hotel Barcelona (Avenida de Pontevedra, 11) para convertelo na sede da súa Fundación en Ourense. Coa recuperación para a cidade deste edificio, a primeira entidade financeira de Galicia incrementará a rede de edificios de uso sociocultural da que dispón ao longo da xeografía galega e culminará o seu obxectivo de poder ofrecer en Ourense unha programación ampla, variada e de calidade nun espazo propio. Caixa elaborará un proxecto de rehabilitación e recuperación integral do edificio, reconstruíndo a antiga fachada.

O edificio, situado na cidade vella de Ourense, ten un indubidable valor arquitectónico e sentimental. O inmoble está situado nunha finca de 614 metros cadrados de planta e ten unha lonxitude de fachada de 13 metros. A infraestrutura que proxecta Caixa Galicia para albergar a súa Fundación ocupará 3.697 metros cadrados que estarán distribuídos en tres sotos, cinco andares e unha baixo cuberta.

En canto ao contido previsto para o edificio, están contempladas a construción de salas de exposicións, auditorio, aulas do Instituto Tecnolóxico Empresarial (ITE) Caixa Galicia, un Centro On de alta tecnoloxía para a navegación libre por internet ademais dun espazo para a sede social. En total, Caixa Galicia habilitará 4.000 metros cadrados de uso público para actividades económicas, sociais, culturais e de lecer en Ourense.