 |
noticiasgalicia.-
Neda, 17 de setembro de 2012. O Concello de Neda, a través
da Concellería de Educación e Cultura, anunciou esta mañá
o inicio dos Cursos de Informática na Casa da Cultura. Segundo
explicou a concelleira de área, Eva Olmo, o programa está
dirixido a persoas sen coñecementos previos, xa que se trata
de cursos de nivel iniciación.
Serán de 15 horas de duración, repartidas en dúas horas
tres días á semana (luns, mércores, venres). Impártense
en dúas quendas, de mañá (de 10 a 12 horas) e de tarde (de
17 a 19 horas), na Aula de Informática da Casa da Cultura
e os grupos están limitados para facilitar a aprendizaxe.
Participan unha vintena de persoas.
A asistencia aos cursos de informática nivel iniciación
é completamente gratuíta e forman parte da oferta de actividades
que organiza o Concello na Casa da Cultura. Así mesmo, a
responsable de Educación e Cultura sinalou que os cursos
son posibles grazas ao convenio de colaboración asinado
recentemente entre o alcalde, Ignacio Cabezón Lorenzo, e
o responsable da Fundación de Estudios e Análises (FESAN),
Francisco López Cañas.
A través do mesmo, catro alumnos do curso "Operacións
auxiliares de montaxe e mantemento de sistemas microinformáticos"
completan a acción formativa con prácticas non laborais.
Trátase dun curso de formación ocupacional do plan AFD que
impulsa a Consellería de Traballo e Benestar Social para
facilitar a inserción laboral de persoas desempregadas.
A través do mesmo, lógrase mellorar a formación polo contacto
co ambiente real de traballo e, nesta liña, o Concello de
Neda apoia e colabora na impartición dos contidos prácticos
de dito curso.
|
