|
noticiasgalicia.-
O Concello de Ares, a través da área de Cultura, está a pechar nestes
días o que será o programa de actividades do Entroido, que neste municipio
terá nos días 19 e 22 as súas xornadas principais (de feito, o Mércores
de Cinza é, unha vez máis, festivo local). Precisamente na última comisión
informativa de Cultura, o concelleiro da área, Eugenio Fernández Lago,
daba a coñecer aos integrantes dos grupos da oposición o calendario
de actividades, que se farán públicas nos vindeiros días.
A maiores, e como primeira iniciativa vencellada a estas datas festivas,
a Concellería de Cultura, a través da Escola de Pintura Municipal,
organiza un obradoiro de confección de máscaras. Dita actividade terá
lugar na biblioteca (Alianza Aresana) nas xornadas do martes 14 e xoves
16, en horario de cinco a sete da tarde, e como informaron dende a
administración local, no obradoiro poderán participar tanto os pequenos
e pequenas da casa (nun principio, de cinco a doce anos) como as súas
familias. As persoas interesadas en participar nesta actividade deberán
formalizar a súa inscripción (de balde) ata o luns 13 na biblioteca.
|
