|
noticiasgalicia.-
Esquerda Unida convida a cidadanía ferrolá a participar nunha noite
das Letras Galegas, que vai ter lugar no pub Cazadores, un clásico
da nosa cidade, para reivindicar nun ton que mistura o festeiro e o
reivindicativo o valor da nosa lingua e cultura. Esta actividade forma
parte do conxunto de mobilizacións que EU prepara co gallo do Día das
Letras Galegas e que culmina coa participación na mobilización nacional
en Compostela o vindeiro día 17 der maio.
O acto para reivindicar o valor de vivir en galego vaise realizar no
pub Cazadores, este mércores, 16 de maio, vésperas do Día das letras
Galegas, ás 22:00 horas, e contará coa participación de Xosé María
Dobarro, que fará unha presentación xeral de Valentín Paz Andrade,
persoeiro homenaxeado este ano, para logo seguir cunha pequena escolla
de poemas a cargo de Guillermo Ferrández e Karlotti Valle. Esquerda
Unida anima a nosa cidadanía a achegarse a unha actividade chamada
a combinar a reclamación dos nosos dereitos lingüísticos e culturais
cunha formula amena e de lecer nas vésperas dunha xornada para exercer
os nosos dereitos lingüísticos e culturais como cidadanía crítica na
manifestación nacional en Compostela.
Diante do meirande ataque á lingua e cultura galegas dende a transición
democrática, Esquerda Unida considera necesario desenvolver e apoiar
todas as iniciativas conducentes a procurar un futuro de igualdade
para o galego, que mediante o desenvolvemento de políticas públicas
ten que superar no medio prazo a condición de lingua minorizada na
que se comprace en mantelo o PP.
|
