Antonio Izquierdo Escribano, director da Escola Galega de Administración Pública:
"Non vou facer sondaxes electorais, pero si estudos estratéxicos para Galicia"

A Escola Galega de Administración Pública (EGAP) comezou unha nova etapa. As carencias formativas, a investigación, o mundo da inmigración ou a avaliación das políticas públicas estratéxicas serán algúns dos obxectivos inmediatos, segundo o seu director xeral, Antonio Izquierdo Escribano. Entre as súas preocupacións está a de abrir máis a escola á colaboración das institucións privadas e avanzar na coordinación das Administracións.

      
¿Que plans ten para a EGAP?
Ademais da formación dos funcionarios, a escola vai ter un labor de investigación moi importante. Faremos cambios substanciais no relativo á formación dos funcionarios e tamén haberá unha parte de investigación nas políticas públicas estratéxicas. Eu non vou facer sondaxes electorais, pero si estudos de carácter estratéxico para Galicia. As liñas principais nas que traballaremos son o avellentamento, a ordenación do territorio e mais o urbanismo, así como contar co goberno multinivel e afianzar a coordinación das Administracións. Do mesmo xeito, atenderemos as necesidades de formación dos funcionarios autonómicos e locais. Esa é a parte que quero reforzar, cun novo equipo de xente que vai vir de universidades americanas e que vai quedar con nós tres anos.

¿Cales son as prioridades?
Teño moita preocupación pola avaliación, pola calidade e pola innovación. Penso facer novos deseños de avaliación das políticas públicas e da formación dos funcionarios. Aínda así, penso tamén insistir moito na innovación, na teleformación e no uso das novas tecnoloxías. O pasado día 13 de febreiro estivemos en Oviedo, onde impartiremos, en colaboración coa Escola de Asturias, un curso de directivos e dirixentes das Administracións públicas, no que se ofrecerán tamén actividades de teleformación. As actuacións conxuntas comezarán con case toda seguridade o vindeiro ano. Unha idea da Escola é abrirse a outras do ámbito estatal, europeo e, probablemente, latinoamericano.

¿Que coste terá todo isto?
A cifra exacta é de 750.000 euros para investigación e outros 250.000 para pagamentos de activivades, investigadores, compra de paquetes de traducións, etcétera.

Falouse de que nesta nova etapa a EGAP íase transformar nun centro de estudos sociolóxicos...
Máis que sociolóxicos, de políticas públicas, porque a selección de investigadores afecta a xente de Dereito, Psicoloxía, Economía, Ciencia Políca, Historia ou Socioloxía. De feito, o número de investigadores no campo da Socioloxía que imos seleccionar será o menor. Será un centro interdisciplinar de políticas públicas.

¿Vaise excluír algo do que se estaba a facer ata o de agora?
Non, nada. Os convenios, a formación de funcionarios, os seminarios e xornadas seguirán. A revista problablemente cambie de contidos e de nome. O que imos facer é colaborar con outras institucións, moitas delas galegas, coeditando libros con diveras editoriais. Ademais, botaremos man de Caixanova e doutras institucións financeiras de Galicia. Traballaremos máis coas institucións e abriremos máis a Escola, pero non vai quedar nada fóra. Probablamente haxa máis diñeiro porque colaboren máis institucións.

¿Cómo se vai abordar o apartado das relacións do Goberno e a sociedade?
Aquí entra a colaboración dos informes sobre o goberno multinivel e sobre a coordenación das administracións, sobre todo no ámbito das políticas públicas estratéxicas, como as referidas á ordenación do territorio. Tamén se tratarán as necesidades de formación, o avellentamento do mercado de traballo ou a inmigración. Serán traballos relacionados con varios departamentos horizontais. Penso que o que necesita Galicia é xente que dea ideas e que avalíe as políticas públicas, e que o Goberno faga o que ten que facer, que é tomar decisións e establecer prioridades. Teño moito interese en que Galicia se abra a Europa. O primeiro seminario será a finais de marzo, e tratará sobre as áreas metropolitanas. Virá xente da OCDE e doutros países europeos e trataremos de recoller leccións para Galicia.

Asegura vostede que hai deficiencias formativas moi acentuadas na Administración local...
Formativas e temén de medios. Malia existir unha cooperación moi estreita coa Dirección Xeral de Administración Local, temos a dificultade de que a poboación é moi dispersa, o que dificulta en gran medida o aproveitamento dos recursos formativos.

En apartados como a inmigración haberá que partir practicamente de cero...
Si, pártese de cero, pero creo que neste terreo en Galicia estamos a tempo de facer as cousas ben, porque temos aínda unha inmigración pouco numerosa, bastante homoxénea e concentrada. Cómpre afortalar a formación dos técnicos municipais, que é onde descansa a a integración. Temos certas ventaxes porque os equipos de investigación das universidades galegas son fortes.

¿Ademais de formación, esta política requerirá tamén medios?
Creo que no ámbito local hai tres vías de actuación. A primeira delas viría co impulso das boas prácticas, cos materiais didácticos. En segundo lugar, atópase a formación dos técnicos municipais nas cuestión xerais e específicas e coa utilización dos medios. E, por último, é importante tamén a estabilidade, porque os programas de integración social precisan dela. Os convenios con organizacións non gubernamentais son importantes pero o Goberno e a Administración teñen que facer o seu labor. Non pode descansar todo o traballo sobre a inmigración nas ONGs.