Carmen Gallego, Conselleira de Pesca:
"Equivócanse os que pensan que o sector conserveiro pervivirá forzando a máquina dos salarios e da precariedade laboral"
•"O traslado da Consellería a Vigo non é un tema que estea en axenda neste momento"

       Ademais de ser unha das catro conselleiras socialistas da Xunta, a pontevedresa Carmen Gallego compaxina o seu traballo á fronte do departamento de Pesca coa súa acta de deputada no Parlamento.

¿Que balance fai destes seis meses na Consellería?        Por agora empezamos a poñer as bases do traballo que pretendemos facer ó longo da lexislatura. Centrámonos en ser capaces de trasladarlle ó sector, a través de múltiples xuntanzas, esa nova forma de facer política baseada na cooperación, o diálogo e a consulta permanente. Buscamos que o sector se involucre nas políticas da Consellería, e que traballe en conxunto, facendo os proxectos que nós cremos que son o seu futuro.       
¿Foi a crise do mexillón o seu maior problema ata o momento?
Creo que dende o principio houbo medios para paliar esa crise económica. De feito, as medidas que puxemos en marcha neses primeiros meses foron históricas, con políticas de prevención cara ó futuro, e outras para paliar a situación. Foi un sector que estivo perfectamente atendido dende a Consellería.       
¿Terá o mexillón galego a súa denominación de orixe?       
Nós cremos que o produto galego tense que diferenciar para poder penetrar mellor nos mercados, e para iso ten que haber unha identificación clara da súa procedencia. A denominación de orixe pode cumplir esa función, e esperamos que ó longo deste ano poidamos ter boas noticias. Conseguilo supoñería que o consumidor vai poder mercar o mexillón galego con toda a garantía de calidade.       
¿E unha tarefa que non resolveu o anterior Executivo?       
O Goberno do PPdeG non pecou de lentitude, simplemente paralizou e obstaculizou o dossier que solicitaba a denominación. Falei coas autoridades españolas e comunitarias, e ninguén entende que ese dossier dese tantas voltas e fose tan mal plantexado.
¿Teme que as novas xeracións de mozos non traballen no mar?       
Ese problema xa existe. Hai dificultades de atopar tripulacións para os buques de gran altura, está empezando a pasas noutras flotas, e incluso na flota artesanal. A xente nova non lle resulta atractiva esta profesión, e hai moitas razóns, como a falla de condicións salariais dignas e dun convenio colectivo. Tamén conta a dureza do oficio, por iso estamos implementando medidas para que a xente nova vexa que o mar é unha profesión de futuro. ¿Cambiarase o sistema de comercialización?       
Si, en breve eliminaremos a obrigatoriedade de subastar á baixa, o que significa liberalizar a forma en que se poden vender os produtos, como no resto de España. Isto vai contribuir a que se xenere maior valor engadido para o produto, e unha maior rendabilidade da súa actividade. ¿Como ve o futuro do sector conserveiro galego?       
O futuro pasa por investir en investigación, desenvolvemento e innovación (I+D+i), porque se equivocan aqueles que pensen que o sector da conserva vai pervivir forzando a máquina dos salarios e da precariedade laboral da xente. E imposible competir cos países asiáticos neses términos, este goberno non está por ese labor. Tamén temos que buscar novas especies e especializarnos, é unha barbaridade que máis dun 60 por cento sexa un único produto, o atún. ¿Hai medo á deslocalización?       
A deslocalización e a internacionalización das nosas empresas non ten por qué ser negativa, sempre e cando non signifique sacar empresas de Galicia e levalas a outros países. A capacidade de transformación de produtos, a tecnoloxía e o "saber facer" que temos en Galicia non ten nada que ver coa deses países. Todo pasa por manter aquí as liñas de producción e as industrias para especializar.
¿Os fondos europeos axudarán a renovar as artes menores?       
Trátase dunha necesidade para nós, Galicia ten unha flota artesanal moi avellentada e necesitamos renovala por motivos de seguridade. Pero esta é unha petición que ata o de agora a Comisión Europea non ten atendido, aínda que estamos traballando co Goberno de Madrid e seguiremos dando batalla.       
¿Que tal son as relacións con Bruxelas e con Madrid?       
Creo que a relación é como ten que ser, fluida e de cooperación. Temos información puntual de todas as cuestións que nos preocupan. A receptividade por parte das autoridades comunitarias nas visitas e contactos que tivemos con eles é positiva.       
¿Preocúpalle a imaxe dos buques galegos como "piratas do mar"?       
Hai empresas que incumplen as normas, pero iso pasa en calqueira outra actividade. O apresamento daqueles dous buques non foi agradable, e moito menos de cara á posible perda de imaxe do sector pesqueiro galego. Pero a imaxe que deu Noruega tampouco é a mellor das posibles, estamos diante dunha acción absolutamente ilegal.       
¿Cumprirase a promesa electoral de levar a Consellería a Vigo?       
Agora mesmo non estamos traballando nesa cuestión. Imos agardar un certo tempo para negociar a modificación da lei cos demais grupos políticos, pero non é un tema que estea en axenda neste momento.