Xosé Manuel González, voceiro do sector do viño do SLG
"Galicia ten que potenciar a comercialización de viños baixo denominacións de orixe para fortalecer o sector"

"As campañas informativas teñen que ser máis agresivas e hai que facer chegar o produto ao consumidor"

A uns meses da colleita deste ano, o sector vitivinícola galego ten que facer fronte a novas dificultades que veñen a sumarse a problemáticas de vello, como é o caso dos excedentes que hai en moitas adegas ou os baixos prezos que perciben os produtores.  A novidade estes días, aparte das propostas da Comisión Europea para a reforma da OCM deste sector, é o 'black rot', un fungo que nesta campaña xa afectou a distintas áreas do Ribeiro, Valdeorras, Monterrei e Ribeira Sacra. O responsable do sector do viño do Sindicato Labrego Galego, Xosé Manuel González Vilas, asegura que a solución para o sector en Galicia pasa por prantar máis e apostar pola calidade.    
   
¿Cales son as perspectivas de cara a vindeira colleita?
A menos de tres meses da próxima vendima atopámonos cunha situación algo complexa. Hai que ter en conta que levamos case cinco anos nos que as producións foron boas. A esto hai que engadir maiores presións da transformación e distribución do viño, sobre todo, pola elevada presenza de viños de mesa e marcas brancas nas grandes superficies. Este ano, se temos unha colleita boa podemos ter algún problema de excedentes pero hai que ir sempre en positivo, porque o 80 por cento dos viños elaborado nas Denominacións de Orixe (D.O.) galegas consúmese en Galicia e ese é un punto forte. Témonos que seguir convencendo de que os nosos viños e a nosa diversidade é algo bo que hai que seguir mantendo.       
¿De cantos excedentes poderíamos estar falando agora mesmo?       
Os excedentes de viño das D.O. non son tan altos como se pensa e hai que darse conta de que en Galicia non son grandes cantidades en comparación con outras rexións.        Existen outras cuestións que repercuten tan negativamente como os excedentes, sobre todo a proliferación de viños de mesa ou a actitude da hostelería, que ofrece aos clientes viños de mesa aos que lle quita máis beneficio ou cobra os caldos de calidade a prezos desorbitados.   ¿Sería posible e desexable aumentar a porcentaxe de viño galego comercializado baixo o amparo dalgunha D.O.?       
Si, é posible e hai que facelo. Hai que reforzar máis o tema da indicación xeográfica porque a comercialización baixo denominación de orixe é o que nos pode fortalecer e a única posibilidade para facer sobrevivir zonas como a Ribeira Sacra.  Campañas informativas
¿Outro dos grandes problemas do sector vitivinícola galego pode ser o descoñecemento dos viños?  Si, hai que facer viños de calidade e promocionalos máis, sobre todo a nivel de Galicia. De feito, hai algunha D.O., sobre todo Valdeorras e Monterrei, que non chegan aos consumidores.       
¿Como se mellorar esto?       
As típicas campañas informativas teñen que ser máis agresivas do que foron ata o de agora, pero tamén hai que facer chegar o produto ao consumidor a través de cauces alternativos, porque só con probar moitos dos nosos caldos mudará a súa percepción.       
O novo Goberno da Xunta puxo en marcha a Mesa do Viño, ¿que lectura lle merecen os pasos dados neste foro?       
Acordos como o que está próximo na D.O. Rías Baixas poden axudar a solucionar problemáticas do sector e, sen dúbida, dan certa tranquilidade e incluso é unha mensaxe positiva.       
¿E as propostas para a reforma da OCM do viño?       
Ten aspectos contraditorios como o arranque, xa que tamén prantexa a liberalización dos mercados. Ademais, Galicia o que precisa son cartos para prantar e para consolidar novas producións coa incorporación de xente moza á actividade.