Gastón Juan, candidato a delegado del Consello de Comunidades Galegas:
"Os emigrantes propoñemos ser Galicia fóra de Galicia pero baixo a acepción de cidadáns galegos na diáspora"

Os centros galegos no exterior pretenden reformular o concepto de emigración e substituír esta acepción pola idea dunha sola Galicia, integrada, en boa medida, por un conxunto de cidadáns que colaboran con esta terra "desde fóra".        Esta é unha das propostas de renovación que o candidato a delegado do Consello de Comunidades da Arxentina, Gastón Juan, expoñerá no VIII Consello de Comunidades Galegas que se celebra entre mañá e pasado en Santiago.

Estase a falar dun aire renovador nas comunidades galegas de Arxentina, ¿en que se basea ese cambio?       
Falamos de ser Galicia fóra de Galicia pero dun xeito distinto, xa non como emigrantes, senón mudando esa acepción pola de galegos que están fóra, na diáspora. A idea de emigrante segue a manter a idea dos 'galegos de aquí' e 'os de alí' e nós queremos falar dunha sola Galicia e traballar todos xuntos deste xeito. Coido que estamos deixando de lado, das dúas beiras, por exemplo o potencial económico que pode representar a participación dos produtos e empresas galegas no Mercosur. E necesaria a renovación. Nós en Arxentina estamos a darlle un cambio ao tema, sobre todo na mentalidade, unha apertura.       
A súa ponencia no Consello de Comunidades Galegas introduce novos conceptos como o dunha 'Galicia Universal'. ¿A que se refire este termo?       
Galicia hoxe ten un entramado a nivel universal verdadeiramente importante. Poucas nacións do mundo realizan unha participación tan activa e contan con tanto alcance como a emigración galega. Mais coido que non está a ser ben aproveitada, nin por Galicia nin polos colectivos emigrantes, así que é o momento para ver aos colectivos no exterior como puntos xeopolíticos de Galicia, fóra dela e así posibilitar cambios desde o económico, o comercial, o social e o cultural e conseguir un intercambio tal que permita crecer a Galicia e ás comunidades galegas fóra de Galicia.       
¿Trátase de buscar un modo de non deixar á emigración no esquecemento?       
No principio da emigración o fluxo viña de América para aquí e pouco era o que podía darlle Galicia aos emigrantes. Hoxe coido que se pode dar un camiño de dobre vía no que os emigrantes cooperen con Galicia en determinados aspectos e que ésta colabore con nós, formando así un entramado que nos permita crecer a todos, os que están dentro e os que están fóra. E necesario comprender que galegos somos todos, os que estamos facendo Galicia fóra e os que constrúen Galicia desde aquí.       
¿Cales son as principais carencias en relación ao recoñecemento da súa identidade como cidadáns galegos?       
Nós non queremos centrarnos só en axudas, non falamos de caridade, porque nin no pasado a emigración axudou por compaixón a Galicia, nin hoxe temos que pensar que Galicia teña que ser caritativa coa emigración. Só pedimos un recoñecemento mutuo, porque formamos todos parte dun mesmo pobo. En Arxentina, Venezuela e outros países percíbese esa 'Galicia fóra de Galicia'.       
¿Que aspectos centran as súas principais demandas de cara á reforma do Estatuto de Galicia e da Lei da Galeguidade?      
Propoñemos cambios que teñen que ver coa integración dos galegos no exterior no caso do Estatuto e, en relación coa galeguidade, reclamamos algo máis que o seu recoñecemento para fillos e netos, como a inclusión na educación xeral de Galicia a emigración, xa que cando se fala da súa Historia este fenómeno queda fóra. Desexariamos obter un recoñecemento que as novas xeracións non lle dan á emigración, alomenos unha gran parte deles.