Camilo Nogueira, ex-eurodiputado e membro da Executiva do BNG

"Galiza é un país urbano e industrial como outro calquera de Europa"

Aldara Iglesias.- O que fora elixido deputado no Parlamento Europeo, Camilo Nogueira, foi motivo nestes días dunha grande sorpresa na sociedade galega ó confirmar a súa decisión de impulsar unha candidatura alternativa que disputará ó portavoz nacional do Bloque, Anxo Quintana, a presidencia do Consello Nacional na XII Asamblea Nacionalista, que terá lugar a comezos de decembro. Aquel ó que Suso de Toro evocou nun dos seus escritos por "pagar uns altos prezos persoais por defender os seus ideais" está preparado para defender ao seu país "dende unha postura plural, de esquerdas e nacionalista".       

Señor Nogueira, ven de presentar en rolda de prensa a súa intención de impulsar unha candidatura ao consello nacional coa intención de servir como "alternativa política". Quen está con vostede nesta labor?

Máis que quén está comigo debería dicirse con quén estou eu. Eu só son un máis neste grupo; despois está Esquerda Nacionalista, moitos da lista dos Non AdscritosŠ Pero é unha candidatura aberta a todo o mundo.

O día 7 do vindeiro mes reuniránse os membros desta candidatura para perfilar o seu programa político. Cáles serán as liñas de actuación a seguir?

O día 7 faremos unha conferencia co fin de presentarnos de maneira oficial na próxima Asamblea. Debatiremos o noso documento e prepararemos a nosa candidatura á dirección do Consello. En canto ás liñas de actuación, queremos manter unha posición política que responda aos intereses da sociedade galega de hoxe. Actualmente propóñense programas que non son compatibles coa nosa realidade social. Galiza é un país urbano e industrial como outro calquera de Europa, aínda que segue a ser marxinado en moitos aspectos.

Esquerda Nacionalista apoiou e adscribiu o documento elaborado polo seu grupo e presentado ó público en xullo deste verán. Qué fins o unen a vostede e a Rodríguez Feixoo?

Pois que ambos queremos responder ás necesidades de Galiza dende unha postura plural, de esquerdas e nacionalista. Queremos falar da economía, sentar as bases da nosa nación e perfilar cal é a súa relación con España así como entendela dentro de Europa.

Neste documento invitábase á reflexión dentro do Bloque. Hai dentro do partido disposición de reflexionar?

A reflexión paréceme indispensable. O Bloque pasou de ser en 2001 a primeira forza da oposición a estar moi por detrás do PSOE nas últimas eleccións. Non compartimos a súa visión só por ter chegado á Xunta; trátase dunha visión desvirtuada. O Bloque cae en picado e eles chámanlle renovación. Parécenos unha grave falta de comprensión á sociedade galega.

Hai quen non seu momento viu detrás do documento unha especie de "plataforma anti-quintana"Š

Nós non temos a Quintana como referencia, é só unha peza máis dunha directiva equivocada.

X.M.Beiras presentou, pouco despois de vostedes, outro documento crítico coa actual directiva do BNG xunto con outros membros do Consello. Van as súas posturas por camiños paralelos?

Eu non son quen de falar por outros, pero nós non teríamos problema con que se uniran ós nosos obxectivos.

Cómo se perfila ó seu parecer, o novo Estatuto?

Non sei ao final cómo quedará, pero se Galiza non é recoñecida como nación o BNG non debería asinar ningún acordo porque racharía coa súa base ideolóxica.

O Consello botou abaixo o fin de semana pasado a proposta de Quintana de sustituír o sistema de asamblea actual polo de delegados comarcais. Foi unha proposta precipitada?

Este tipo de decisións hai que levalas a debate valorando as necesidades de conxunto. Por eso Quintana saíu derrotado, só quixo garantir un resultado favorable na Asamblea Nacional.

Xa para rematar, como viviu vostede a oleada de incendios e como valoraría a xestión de Suárez Canal?

De Suárez Canal non quero falar, é o meu compañeiro. Sen dúbida estamos ante unha nefasta política anti incendios que xa ven de atrás. Aínda así, a posición do BNG de ao falar de terrorismoŠ non me parece unha terminoloxía progresista, precisamente.