José Manuel Barreira, director de Bren Entertainment:
"Preferimos as historias clásicas, ás que lle aportamos unha visión diferente"

noticiasgalicia.- Galicia é xa toda unha factoría da animación. En parte, grazas a Filmax Animation, que conta cun estudio de animación en Santiago. Bren Entertainment, dirixido por José Manuel Barreira (A Fonsagrada, 1960), acaba de rematar a película de animación en 3D 'Donkey Xote', que se estreará en breve.      

¿Como xurdiu 'Donkey Xote'?       
A hora de escoller proxectos, preferimos historias clásicas, ás que lle aportamos unha visión diferente. Aínda que non rexeitamos facer historias orixinais, como 'Gisaku' ou 'Nocturna', a verdade é que tanto 'El Cid', como 'Pinocho', 'Donkey Xote', ou 'Pérez, o ratiño dos teus soños', están baseadas en historias moi coñecidas. 'Donkey Xote' pensouse como algo en clave de comedia dando a visión de Rucio da historia do Quixote.       
Debe ser curioso traballar con actores creados por un mesmo...       
Eu teño experiencia en traballar con actores e con debuxos. A verdade é que os animadores son actores, que actúan a través do boneco, é algo que temos moi claro. Eles poñen o punto de interpretación e crean a personaxe. A expresividade, a actuación da personaxe, é deles, que lles dan vida a través das ferramentas informáticas.       
¿E fácil atopar animadores 3D en Galicia?       
Si, en España en xeral sempre houbo unha tradición de bos animadores en 2D, e moitos deles pasaron xa ó 3D. O que sabe animar, faino igual en 2 ou en 3D, porque é un arte. O único que cambia é a ferramenta. Hai unhas fornadas interesantes que saen das escolas, no Máster de Animación Dixital da Universidade de A Coruña, e tamén hai moito autodidacta. Hai moi bos animadores en Galicia, pero non temos problema en traer a traballar a Santiago a xente de Italia, Canadá, Francia,... Veñen a Bren sen problema.       
¿Como valora a situación do cinema de animación en Galicia?       
Galicia está na primeira fila dende hai algúns anos, porque aquí confluíron as iniciativas dalgúns emprendedores de poñer aquí a súa división de animación, como Filmax, cun proxecto que calificaría de moi ambicioso, ou Dygra e Continental, coa súa sección de animación. Filmanova ten interese en poñer en marcha proxectos de animación... Dende o punto de vista de volume de investimento e de risco que se toma, o volume de producción de Bren Entertainment, de seis películas en seis anos, maioritarias ou en coproducción con outros países, é dunha dimensión que nos sitúa como unha das empresas referentes, non só en España, senón a nivel europeo.       
¿Cales son eses riscos ós que se enfronta Bren?       
Temos feito proxectos de 2D e 3D arriscados, como 'Gisaku', que é o primeiro 'anime' feito en Europa, ou películas puramente en 3D como 'Pinocho' ou 'Donkey Xote', con orzamentos moi grandes e retos tecnolóxicos importantes. Agora fixemos un reto novidoso na industria europea con 'Pérez, o ratiño dos teus soños', que integra imaxe real e 3D, que tivo un grande éxito en Arxentina.       
Iso require moito investimento, ¿con que axudas contan?       
O principal activo que temos é a nosa ferramenta de ventas internacional, Filmax International, a nosa distribuidora, que nos permite financiar as películas, máis que con axudas, con realidades de ventas internacionais. Eso dános grandes satisfaccións e a posibilidade de seguir apostando por esa liña.       
¿Notan perxuízos pola piratería?       
Aínda non hai moito estiven manifestándome cos videoclubes de Galicia, pioneiros en España en empezar a denunciar o grande problema que ten a industria dos contidos no mundo enteiro e en particular en España, porque somos o primeiro país do mundo en pirateo. Estános afectando moitísimo, fainos plantexar moitas cousas e afecta a moitísimos postos de traballo nas produtoras e en empresas tan próximas como os videoclubes.       
Distribúen a nivel internacional, pero aquí podemos ver as animacións en galego...       
Julio Fernández [presidente de Filmax] foi pioneiro na distribución das cintas en galego e en castelán cando aínda non ofrecían axudas por iso. 'O pico das viúvas', do ano 93, é unha das primeiras dunha longa lista de títulos distribuidos ou producidos por Filmax dobrados ó galego. Dende o principio, houbo esa sensibilidade por parte de Filmax e creo que demostramos que se podía facer. Na animación, non temos feito ningunha que non estea dobrada ó galego.        ¿E como é aceptado polo público?       
Eu creo que eso está resolto, a TVG fixo un gran traballo nese sentido e hoxe pode ver un producto audiovisual en galego e xa non chama a atención. A dobraxe non é un problema, e incluso ás veces incluso ten maior calidade cá dobraxe en castelán ou outra lingua. Creo que ninguén rexeita ver unha copia de cine en galego.