|
noticiasgalicia.- Os museos
da Rede Museística dependente da Área de Cultura e Turismo da Deputación
de Lugo foron seleccionados, en representación de Galicia, para participar
no proxecto Quen lle dá a volta á tortilla. Homes, mulleres, xénero
e roles nas coleccións de tres museos provinciais , unha iniciativa
na que participan tamén o Museo de Bellas Artes de Murcia e o Museo
de León. Neste proxecto, xestionado polo colectivo Medusa Mediación
e subvencionado polo Ministerio de Cultura, interveñen como representantes
dos respectivos museos Luís Grau (director do Museo de León), Juan
Sandoval (director do Museo de Murcia) e Encarna Lago (xerente da Rede
Museística de Lugo), así como Noa Persán, Paula Cabaleiro e Iago Eireos
como artistas invitados.
Quen lle dá a volta á tortilla?... concíbese como unha oportunidade
para seguir reformulándonos as relacións entre mulleres e homes e a
nosa propia forma de estar e ser no mundo, intentando “darlles a volta”
a tantos e tantos prexuízos e estereotipos que aínda nos embelecan,
coartan e limitan. Neste senso, a proposta que fai a Rede Museística
da Deputación de Lugo a este proxecto, invita a analizar a representación
que se fixo tradicionalmente do que se considera ser home e ser muller.
Para iso partirase de 20 obras da colección permanente e crearase un
grupo formado polas persoas interesadas que analizará e reflexionará
sobre os modelos que transmiten esas imaxes. A primeira fase do proxecto
consiste no desenvolvemento dun curso práctico ou obradoiro de 20 horas
de duración que se vai desenvolver nas sedes dos catro museos da Rede
desde o martes 7 ao sábado 11 de febreiro, co seguinte calendario:
- Museo Provincial de Lugo, (días 8 e 11)
- Pazo de Tor (Monforte de Lemos), (día 7)
- Museo Provincial do Mar, San Cibrao-Cervo (día 9)
- Museo Etnográfico de San Paio de Narla, en Friol, (día 10).
O obradoiro exponse de xeito moi práctico e combina aspectos teóricos
e aspectos lúdicos, demostrando que aprender é divertido. A súa metodoloxía
baséase nunha reflexión lúdica e participativa, onde se valora todo
o coñecemento e experiencia das persoas que estean involucradas, máis
aló de cuestións teóricas, de xénero, procedencia ou idade. Pode participar
calquera persoa con ganas de coñecerse máis a si mesma e coñecer máis
o mundo en que viven. Froito deste obradoiro será unha exposición itinerante
polos museos participantes no proxecto. Para máis información e inscricións,
os interesados/as deben dirixirse á web do colectivo Medusa Mediación,
proxecto: Quen dá a volta á tortilla?
|
