|
noticiasgalicia.- O
Alcalde de Lugo, José López Orozco, preside a Comisión de Seguridade
e Convivencia Cidadá da Federación Española de Municipios e Provincias,
que quedou constituída hoxe, nunha xuntanza celebrada en Madrid. Na
reunión, López Orozco explicoulle ó resto dos membros da Xunta de Goberno
da Comisión a iniciativa que puxo en marcha o pasado día 1 o Concello
de Lugo para mellorar a seguridade viaria pola que todos os vehículos
municipais e de empresas que prestan servizos ó Concello levan prendido
o alumeado de cruce tamén durante o día. Entre os acordos tomados nesta
primeira xuntanza, acordouse establecer como dous dos principais obxectivos
da Comisión un Sistema Público de Seguridade que permita unha coordinación
maior e máis eficaz entre os corpos e forzas de seguridade e a adopción
de acordos entre Administracións para o desenvolvemento de planes e
programas conxuntos de prevención e actuación.
A Comisión continuará durante este mandato a colaboración co Ministerio
do Interior para a aprobación nos concellos dos seus respectivos regulamentos
das Xuntas Locais de Seguridade e dos Consellos Locais de Seguridade,
así como para que os concellos se asocien para a prestación do servizo
de policía local. Nestes catro anos, a Comisión seguirá a implantación
da Ordenanza Tipo de Seguridade e Convivencia Cidadá e ten prevista
a elaboración dun mapa municipal e dun banco de experiencias locais
sobre esta materia. Ó mesmo tempo, participará nos traballos de deseño
do Plan de Acción para a Seguridade Vial, no seo da Comisión Mixta
integrada por técnicos da DXT e da FEMP. A Comisión que preside López
Orozco tamén favorecerá o desenvolvemento nos municipios dos chamados
Pactos Cívicos pola Convivencia e, nun terreo máis concreto, pedirá
unha acción coordinada de Interior e as Entidades Locais sobre o exercizo
da prostitución na vía pública, en torno ás propostas elaboradas pola
FEMP. Asimesmo, reclamará que a vixianza e a presenza activa nas zonas
de "botellón" se leve a cabo de forma conxunta polas Fuerzas
e Corpos de Seguridade do Estado, policía autonómica e policías locales.
|
