 |
noticiasgalicia.-
O Tenente-alcalde, o nacionalista Antón Bao, recibiu este
venres a preto dun cento de docentes e alumnos participantes
no VI encontro Sociocultural Luso-Galaico que na xornada
visitaron a cidade de Lugo. Na edición deste ano do encontro
Luso-Galaico participan a Escola Secundária Fernão de Magalhães
de Chaves e o IES Xesús Taboada Chivite de Verín. Antón
Bao agradeceu o feito de que, neste ano, "os organizadores
tiveran o ánimo de achegarse a coñecer a cidade de Lugo".
Bao engadiu que "Lugo é referente no que foi o pasado
romano peninsular e gustamos de que os nosos veciños de
Chaves, que conservan unha fermosa ponte romana, poidan
tamén coñecer a nosa muralla e a nosa Ponte que recuperará
en breve o seu mellor aspecto". Bao aproveitou para
lembrarlles aos rapaces, nesta semana das letras galegas,
a importancia de conservar e mimar o noso idioma xa que
"é unha importantísima ferramenta para abrirnos cara
os países lusófonos".
Ademais da recepción no concello os compoñente da expedición
Luso-Galaica percorreron, durante a xornada, o adarve da
muralla e visitaron o Museo Provincial e o Centro de Interpretación
da Muralla. Segundo relataron os organizadores do encontro
"tamén fixemos un percorrido polo casco histórico prestando
especial atención á Catedral, Piscina Romana, Círculo das
Artes, Concello, Praza de Santo Domingo, Pazo da Deputación,
Igrexa de San Pedro e Praza do Campo coa súa Fonte de San
Vicente".
Despois de almorzar ao carón do Miño navegaron no catamarán
que sae dende Os Robles para voltar despois cara Verín e
Chaves. Estes encontros Luso-Galaico nacen ao comezo do
curso escolar 2006/07, cando o Equipo de Normalización Lingüística
e a dirección do centro do "IES Xesús Taboada Chivite"
de Verín, consideraron que dada a súa situación xeográfica,
sería imprescindible programar unha actividade conxunta
cos veciños de Chaves, xa que ata ese momento e a pesares
de estar tan preto, a distancia era enorme se nos referimos
a actos escolares mancomunados.
O obxectivo básico é facilitar aos rapaces o coñecemento
e valoración das culturas e tradicións a través dunha experiencia
intercultural. Tamén se pretende, con estes encontros, inculcar
na mocidade a idea de que as linguas son unha forma de comunicación
entre os pobos, que unen culturas e sustentan tradicións.
|
