|
noticiasgalicia.-
Este mércores día 14 de marzo presentábase no CGAC a plataforma
en defensa dos medios públicos que se crea ante a vaga de
recortes que están a pór en perigo a supervivencia dos medios
públicos e outros servizos públicos; ante as intencións
dos gobernos galego e estatal de desmantelar os medios de
comunicación propios, que cualifican de "superfluos,
deficitarios e que non consideran servizo público esencial"
e en defensa de medios imparciais, plurais e con control
democrático por parte da cidadanía. Candido Pazó e Lola
Ferreiro, foron os encargados de presentar a plataforma
e expor as razóns que levaron á súa constitución. Xunto
a eles, e para manifestar o seu apoio ao manifesto ao que
se deu lectura ao remate do acto, asistiron tamén representantes
das xa 30 organizacións políticas, sindicais e sociais adheridas
á plataforma. Nas súas interevencións denunciaron que a
recente modificación da lei de creación da CRTVG abre as
portas á privatización encuberta do ente público e á súa
redución a unha institución de valor anecdótico.
Unha lei que, explicaron, non recolle as melloras reais
que precisan os medios públicos galegos e que mesmo compromete
seriamente o seu futuro. Medidas que deberían garantir a
pluralidade, a independencia, a profesionalidade e a eficiente
xestión da compañía de radiotelevisión pública de Galiza.
A plataforma parte da necesidade de que os galegos e galegas
contemos cun vehículo de comunicación, expresión e difusión
"da nosa esencia e do noso ser como país". E alerta
de que "se desaparecen a radio e a televisión públicas
acabará desaparecendo parte do noso acervo histórico, cultural,
lingüístico e audiovisual", alén do garante dun dereito
fundamental da cidadanía: "o dereito á información
rigorosa, á emisión de programas do interese de todas e
todos, desde unha orientación ampla, imparcial, non partidista,
que contribúa a deconstruír os prexuízos e fomente a pluralidade
e a igualdade de xénero".
Preténdese, xa que logo, buscar un compromiso de cambio
que, explicaron, debe ser real e debe ser exixido tanto
a goberno como a oposición "como mulleres e homes suxeitos
de dereito e non obxecto de privilexios de quen goberna".
En consecuencia, a plataforma aposta por uns medios públicos
profesionais, honestos, transparentes na súa xestión, sustentábeis
e responsábeis coa sociedade "á que se deben, que finalmente
é quen as paga". Antes de dar lectura ao manifesto,
Lola Ferreiro explicou tamén que os medios audiovisuais
públicos son un servizo esencial de interese xeral, que
ten como misión difundir contidos destinados a garantir
a diversidade cultural e lingüística, a independencia e
a veracidade da información, o pluralismo, a cohesión social,
a promoción dos dereitos cívicos e as liberdades públicas
e a calidade da propia democracia. Os integrantes da plataforma
coinciden en considerar que estes contidos non son simples
mercadorías destinadas ao consumo, senón que transmiten
valores, contribúen a construír un xeito de ver o mundo
e a xerar estados de opinión.
"Por iso requiren dun control democrático, exercido
pola cidadanía, que debe estabelecer os criterios orientadores
sobre eses contidos e vixiar o seu cumprimento". Este
é o servizo que consideran que debería e que só pode prestar
o servizo público de radiodifusión. Porén, consideran que
hoxe, a radiotelevisión pública está sometida a unha "estratexia
xeneralizada de acoso e derribo".
Estratexia que, advertiron, vai máis alá das tradicionais
críticas de carácter ideolóxico, legal ou financeiro e que
busca "cuestionar a natureza mesma da súa existencia".
O obxectivo, denuncian, é facer "innecesario, insostíbel
e mesmo indesexábel o mantemento da radiotelevisión pública",
aproveitando a coartada da crise económica para impor recortes
no gasto público, introducindo as receitas neoliberais,
do mesmo xeito que se está a facer co resto dos servizos
públicos. De feito, afirman que "o desmantelamento
dos medios de comunicación públicos non é un feito illado,
senón que forma parte dunha estratexia xeral para a desarticulación
dos servizos públicos e, xa que logo, dos dereitos da cidadanía".
Por iso denunciaron que, de fondo, están os intereses políticos
e privados de favorecer as canles privadas e de pago, que
buscan asegurarse o beneficio económico á conta da calidade
do servizo público e das condicións do emprego. Unha estratexia
na que se inscribe, ao seu entender, a Lei de Medios público
de comunicación audiovisual de Galiza.
Candido Pazó deu lectura ao manifesto, no que se recollen
os principais aspectos que defende a plataforma, desde a
identidade nacional e o impulso á normalización lingüística,
até o respecto aos dereitos humanos, pasando pola promoción
da igualdade entre mulleres e homes, con especial atención
á infancia e á mocidade; cunha programación e servizos audiovisuais
variados e gratuítos; veraz, imparcial, independente, respectando
a pluralidade de fontes e actores; que estimule a participación
democrática e que fomente o acceso universal aos servizos
relacionados coa Sociedade da información. Todo isto contando
cos medios materiais e humanos necesarios para desenvolver
con autonomía o papel encomendado e cumprir ademais coa
súa función estratéxica como motor do desenvolvemento da
produción audiovisual.
MANIFESTO EN DEFENSA DA CRTVG
Neste contexto, as persoas abaixo asinantes, representantes
de organizacións sociais, sindicais, políticas, profesionais
e académicas, e cidadás e cidadáns particulares, consideramos
que a sociedade galega está ante un momento crucial para
mellorar e afianzar o seu modelo de servizo público de comunicación,
e expresamos a nosa vontade de defender a existencia dunha
radiotelevisión pública:
1. Que defenda a identidade nacional de Galiza, promova
o coñecemento e a difusión da súa historia e a súa cultura
e impulse a normalización da súa lingua. O galego será a
lingua vehicular de todas as emisións e contidos dos medios
audiovisuais públicos, debéndose atender e coidar a calidade
lingüística das mesmas.
2. Que impulse o coñecemento e o respecto aos dereitos humanos
(dos homes, das mulleres e da infancia), cívicos e políticos
recoñecidos nos tratados e normas internacionais. 3. Que
promova a igualdade entre mulleres e homes, desde o uso
dunha linguaxe non sexista, ata a introdución da perspectiva
de xénero en todos os contidos (económicos, políticos, sociais,
culturais, deportivos, etc), incluíndo o tratamento informativo
da saúde, da educación e da violencia de xénero e, en xeral,
a imaxe que se ofrece das mulleres.
4. Que dedique especial atención, pola súa importancia futura
para a sociedade, á infancia e á mocidade, reforzando a
función educativa e socializadora dos medios audiovisuais
na transmisión dos valores cívicos e democráticos, incluíndo
expresamente a promoción da igualdade de xénero.
5. Que ofreza gratuitamente un conxunto de programacións
e servizos audiovisuais variados, equilibrados e de calidade
para todos os públicos e que asegure aqueles contidos destinados
a satisfacer as necesidades e demandas das minorías máis
desfavorecidas da nosa sociedade, atendendo ás súas problemáticas
específicas, a prol da integración e a cohesión social.
6. Que informe con veracidade, imparcialidade e independencia,
con respecto á pluralidade de fontes e actores, afastándose
da banalización e o sensacionalismo e coa profundidade e
contextualización necesarias para a cabal comprensión dos
feitos que se informan.
7. Que estimule a participación democrática mediante unha
regulación que asegure a aplicación efectiva e sistemática
do dereito de acceso aos medios públicos dos grupos sociais
e políticos significativos, segundo criterios obxectivos
de representación ou implantación social, sen que poida
excluírse a expresión dos grupos sociais que representan
as minorías lexítimas da sociedade nin as formacións políticas
sen representación parlamentar, en atención ao respecto
ao pluralismo.
8. Que fomente o acceso universal aos servizos relacionados
coa Sociedade da Información, participando no progreso tecnolóxico
e na utilización das novas técnicas de produción e difusión
de programas e servizos audiovisuais, incluídos os dixitais
e en liña, susceptíbeis de enriquecer e completar a súa
oferta de programación.
9. Que dispoña da estrutura, dimensión e recursos materiais,
orzamentarios e humanos necesarios para desenvolver con
autonomía as misións de servizo público que ten encomendadas,
mantendo en todo caso o equilibrio entre a utilización efectiva
e eficiente dos seus propios recursos e o obrigado cumprimento
das cotas que, conforme á lexislación vixente, lle corresponde
á industria audiovisual independente.
10. Que cumpra a súa función estratéxica como motor do desenvolvemento
da produción audiovisual independente con transparencia,
evitando as contratacións opacas e a concentración das compras
nun número reducido de provedores.
Por último, instamos ao Parlamento de Galiza a regular por
lei, á maior brevidade posíbel, a creación dunha autoridade
audiovisual independente do goberno e dos operadores, que
vele polo cumprimento da normativa reguladora do sector
audiovisual xestionado pola Xunta, nomeadamente das obrigas
de servizo público encomendadas á CRTVG, conforme aos principios
expresados neste manifesto.
|
