noticiasgalicia.- Expertos en acuicultura de Galicia e representantes da Organización de Nacións Unidas para a Agricultura e a Alimentación (FAO) viaxan a Centroamérica e Perú nunha misión de diagnose sobre a acuicultura rural, dentro do proxecto "Acuicultura rural e de pequena escala para o desenvolvemento sustentable en América Latina e o Caribe", que levará a cabo o Centro Tecnolóxico do Mar-Fundación CETMAR por encargo da Consellería de Pesca e Asuntos Marítimos. A realización do devandito proxecto enmárcase dentro do Memorando de Entendemento que a titular do citado departamento autonómico, Carmen Gallego, asinou con representantes de FAO en Roma no mes de xullo.

Entre as accións contempladas dentro dese acordo de cooperación atópase esta inicitiva para o desenvolvemento da actividade acuícola en América Latina e o Caribe, cuxo obxectivo é mellorar os resultados da acuicultura rural e de pequena escala mediante módulos de produción que fomenten a capacidade técnica e a formación dos acuicultores dos países interesados. Nese contexto, a delegación conxunta FAO-Xunta de Galicia visitará entre o 23 de agosto e o 12 de setembro

El Salvador, Nicaragua, Costa Rica, Panamá e Perú co fin de coñecer sobre o terreo o desenvolvemento da acuicultura neses países, así como a súa infraestrutura. Ademais, os integrantes da misión manterán reunións con autoridades e representantes de organismos de investigación para identificar as institucións que poderán participar activamente neste proxecto. Por parte de Galicia participarán na misión de diagnose José Luis Rodríguez e María del Carmen Andrés, do Instituto Galego de Formación en Acuicultura (Igafa); Grabriel de Labra, do Centro Tecnolóxico do Mar, e os investigadores José Iglesias e José Peleteiro, do Centro Oceanográfico de Vigo.

Por parte de FAO viaxarán Doris Soto, oficial do servicio de Ordenación y Conservación de la Acuicultura (FIMA) do departamento de Pesca y Acuicultura, e Jorge González de la Rocha, oficial principal de dito departamento. Como resultado da misión elaborarase un documento de proxecto para a súa posterior aprobación por parte dos países e organismos participantes. Prevese que a formulación definitiva do proxecto estará finalizada en novembro de 2008 de cara a súa posta en marcha no primeiro trimestre de 2009.