 |
noticiasgalicia.-
Por iniciativa da CRTVG decídese modificar
o convenio anual que cada ano se renovaba coa Consellería
de Medio Ambiente, Territorio e Infraestruturas co propósito
de achegar ós galegos a información meteorolóxica de primeira
man. Ata o de agora, a CRTVG contaba con profesionais cualificados
traballando diaria e exclusivamente na cadea.
Dentro das súas atribucións destacaban, xunto coa elaboración
e presentación da previsión meteorolóxica nos distintos
espazos da cadea, o proceso de control, vixiancia e alerta
inmediata ós servizos informativos daqueles fenómenos meteorolóxicos
de especial relevancia para a sociedade galega, ademais
de asesorar ós redactores da TVG na elaboración de novas
relacionadas co tempo. Deste xeito a información de MeteoGalicia
víase completada, ó tempo que se axustaba ás necesidades
específicas da televisión pública galega.
Motivos de aforro económico
A CRTVG esgrime por unha banda motivos económicos e por
outra a internalización do servizo para non renovar o actual
convenio e asinar un novo no que se modifican substancialmente
as condicións de colaboración entre ambas institucións.
A externalización do servizo segue existindo, porque a información
seguirá chegando de MeteoGalicia a través doutro convenio;
e o suposto aforro de cartos non existe, porque só o pago
do soldo base dos novos presentadores supera a cantidade
do anterior convenio. Neste punto compre comentar que hai
uns 3 meses, os actuais presentadores de O Tempo tras solicitar
sen éxito, a interlocución coa dirección da TVG para regularizar
a súa situación laboral, iniciaron o proceso legal de demanda
de recoñecemento dos seus dereitos, que deberían ser equiparables
ós do resto do persoal da CRTVG
Coñecementos en meteoroloxía
A dirección da Compañía pretende que, tras 15 días de formación
"expréss", os xornalistas escollidos continúen
a achegar ós galegos unha información meteorolóxica rigorosa,
tan importante nun país que vive mirando ó ceo. Non cremos
preciso lembrar que é moita a xente que segue a vivir do
mar, do campo ou do turismo e para eles, unha información
meteorolóxica precisa, é fundamental. Entendemos que estes
feitos, ademais de ir na dirección contraria do resto das
cadeas de televisión, racha co modelo maioritario nas televisións
públicas no que, a responsabilidade técnica dun contido
tan específico recae en profesionais da meteoroloxía, polo
que supón un paso atrás na historia de avance e mellora
continua da cadea a prol da calidade do servizo público
ofertado á sociedade galega.
OS METEORÓLOGOS DA TVG
|
