O sector audiovisual esixe a Touriño que cumpra coas medidas de apoio comprometidas

noticiasgalicia- Máis dun mes despois da reunión mantida co presidente da Xunta, Emilio Pérez Touriño, as asociacións de profesionais e empresarios do sector audiovisual piden o cumprimento dos compromisos adoptados polo máximo mandatario galego para superar as dificultades que atravesa o denominado sector estratéxico. Ante todo, as oito organizacións subliñan a necesidade de convocar "urxentemente" as mesas de traballo que reúnan os profesionais e empresarios involucrados no sector así como coas distintas administracións con competencia no audiovisual, tal como anunciara o titular do Goberno autonómico.

O pasado día 30 de maio, as asociacións enviaron unha carta a Touriño na que sinalaban a urxencia da convocatoria da mesa, "sen obter ata o momento resposta algunha". Os implicados lembran ademais que o presidente acordara unha segunda reunión co sector para setembro ou outubro coa fin de repasar os logros acadados.

Dende o sector, indican que a situación "empeora día a día", e evidencian que a día de hoxe "non se realizaron gran parte dos pagos" correspondentes ás convocatorias de axudas a proxectos audiovisuais do ano 2007, uns retrasos que afectan a "máis da metade dos proxectos aceptados", segundo afirma o presidente da Asociación de Actores e Actrices de Galicia, Vicente Montoto. Ademais, critican que aínda non se convocaran as axudas anuais á produción e promoción de longametraxes, xa que consideran que a convocatoria "nunca se retrasara tanto".