noticiasgalicia.- A Consellería de Pesca e Asuntos Marítimos vén de asinar un convenio de colaboración co Instituto Tecnolóxico para o Control do Medio Mariño de Galicia (Intecmar) e o Consello Regulador da Denominación de Orixe Mexillón de Galicia para levar a cabo a segunda anualidade do subproxecto "Avaliación do impacto dos métodos e niveis utilizados para o control de toxinas de mexillón", enmarcado no Plan Nacional "Cultivo de Mitílidos: expansión e sostibilidade", aprobado a finais de 2006 pola Junta Asesora de Cultivos Marinos (Jacumar) e no que tamén participan Andalucía, Baleares, Canarias e Cataluña.

Esta iniciativa na que participan Pesca, o Intecmar e o Consello Regulador trata de centrarse na avaliación do impacto dos métodos e niveis empregados para o control das toxinas do mexillón, causantes das mareas vermellas. De feito, na nosa comunidade autónoma o maior problema do cultivo de mitílidos radica na presenza de toxinas, principalmente PSP e DSP, que provocan importantes perdas económicas, tanto pola súa incidencia no recurso como polo alto custo dos sistemas de control empregados.

Segundo o cronograma previsto, nesta segunda anualidade continuarase, como xa se fixo o exercicio pasado, coa recollida de mostras e co estudo comparativo da eficacia técnica e económica dalgúns dos novos sistemas de cuantificación de toxinas e a súa repercusión no sistema de control. Ademais, realízase un estudo da sensibilidade das metodoloxías dispoñibles e as posibles consecuencias económicas derivadas da aplicación de diferentes niveis de toxicidade. Para levar a cabo o seguimento, interpretación e avaliación das accións derivadas do convenio créase unha comisión de seguimento integrada por representantes das tres partes que asegure o bo fin e o cumprimento do mesmo.

Ademais, dende o Intecmar e o Consello Regulador adquírese o compromiso de informar periodicamente da marcha dos traballos a través dos correspondentes informes ao responsable do proxecto e investigador principal do mesmo. A importancia desta actuación radica en que Galicia é un dos principais produtores de mexillón a nivel mundial, á vez que o mitílido das nosas augas foi o primeiro produto do mar en acadar o distintivo Denominación de Orixe Protexida outorgado pola Unión Europea. De feito, no ano 2007 as bateas do noso litoral produciron máis de 208.000 toneladas deste recurso, o 94 por cento da produción de acuicultura mariña da nosa comunidade autónoma.