A Axenda 21 Escolar en Galicia: outra oportunidade perdida

noticiasgalicia- A Axenda 21 Escolar (A21E) é un proceso que pretende introducir o concepto de sostibilidade no ámbito do ensino a través da ambientalización dos centros educativos, e que persegue a sustentabilidade ambiental, a equidade social e a paz. Na actualidade esta iniciativa está a levarse a cabo con éxito en moitos países, destacando, no estado español, as iniciativas desenvolvidas en Euskadi e Cataluña nos últimos anos.

No curso 2004-2005 púxose en marcha un proxecto piloto que pretendía comezar coa implantación de Axendas 21 Escolares en Galicia, impulsado pola Consellería de Medio Ambiente da Xunta de Galicia. No desenvolvemento do programa nos cursos 2004-2005 e 2005-2006 os 16 centros participantes careceron de apoio e/ou asesoramento, traballando e sacando adiante as distintas iniciativas relacionadas unicamente co voluntarismo e convencemento dalgúns profesores.

Coa chegada do novo goberno, logo de moito tempo sen unha resposta clara da administración, gran parte do profesorado agardaba a posta en marcha de proxectos que posibilitaran o desenvolvemento destas potencialidades e de accións que permitiran aplicar realmente as propostas asociadas ás Axendas 21 Escolares no entorno dos centros educativos.

O curso 2006-2007 arranca coa proposta do Programa de Axenda 21 Escolar en Galicia, promovido polas Consellerías de Medio Ambiente e Desenvolvemento Sostible e a Consellería de Educación e Ordenación Universitaria, contando tamén, na súa fase inicial, co asesoramento técnico da Sociedade Galega de Educación Ambiental (SGEA). No curso que agora remata (2007-2008), e con máis de 50 centros de toda Galicia participando no programa, a SGEA considera que, aínda valorando moi positivamente a posta en marcha dun programa como o das Axendas 21 Escolares, son moitos os déficits e carencias desta iniciativa