O PPdeG pide a intervención do Valedor do Pobo ante a censura e falla de pluralidade na TVG

noticiasgalicia. - O PPdeG requeriu hoxe a intervención do Valedor do Pobo, ante a situación de censura, falta de pluralidade, neutralidade e imparcialidade informativa que se produce na TVG no que atinxe ao partido maioritario en Galicia. Os populares presentaron unha queixa polo tratamento que da o TVG ao PPdeG, acompañada dun amplio dossier sobre a manipulación nos informativos da canle galega.

A canle silencia de xeito habitual as actividades do partido, conculcando o dereito dos cidadáns a recibir información veraz e poder formarse unha opinión libre. Ante a reiterada negativa da CRTVG a correxir a situación de censura reclamada tanto no Parlamento de Galicia como no Consello de Administración, os asinantes desta queixa, no seu propio nome e en representación do PPdeG, requiren a intervención do Valedor do Pobo para que adopte as resolucións que estime oportunas para garantir os dereitos constitucionais e legais vulnerados.

A queixa está firmada por Alfonso Rueda, secretario xeral do PPdeG; Enrique López Veiga, membro do Grupo Popular na Comisión Permamente non Legislativa de Control da CRTVG e, Mar Sánchez Sierra, Secretaria Executiva de Comunicación do PPdeG. En concreto o PPdeG solicita a realización dun recordatorio aos responsables da TVG dos deberes constitucionais e legais que teñen que cumprir no funcionamento televisivo.

Tamén pide a adopción dunha recomendación para que se tomen as medidas oportunas por unha banda, para garantir en xeral o pluralismo na TVG e a realidade da diferente distribución de forzas entre os diversos partidos; por outra banda, e xa máis en particular, que se garanta o pluralismo e a verdadeira distribución de forzas entre os partidos nos programas informativos, nas entrevistas e debates que se emitan, e no tratamento dos actos políticos.