Pesca aclara que o peixe consumido nos colexios no marco da campaña "Uhmm..peixe!!" é subministrado por armadores e acuicultores galegos

noticiasgalicia.- A Consellería de Pesca e Asuntos Marítimos quere poñer de manifesto que os provedores dos recursos pesqueiros para a realización da campaña de promoción de consumo de peixe entre os nenos galegos, "Uhmmm...peixe!!", son as principais asociacións de armadores, produtores e acuicultores de Galicia que colaboran no financiamento do produto. Deste xeito, estas organizacións contribúen de forma importante ao desenvolvemento e consolidación desta iniciativa que promove o departamento de Pesca, en colaboración coas consellerías de Sanidade e de Educación e Ordenación Universitaria.

Así, as entidades colaboradoras con "Uhmm...peixe!!" son Armadores de Burela S.A. (ABSA), Porto de Celeiro, Asociación de Armadores de Marín, Cooperativa do Mar de Ribeira, Cooperativa de Armadores de Vigo (Arvi), Asociación de Produtores de Rodaballo (Aroga) e o Consello Regulador do Mexillón de Galicia. Pola súa banda, a Consellería de Pesca e Asuntos Marítimos aboa a parte restante dos gastos derivados da compra do peixe e é a responsable de organizar o traslado aos centros educativos do produto debidamente fileteado e desespiñado, para facilitar o labor dos profesionais do comedor.

"Uhmm.... Peixe!!" ten como eixo central unha acción práctica que consiste en que todos os alumnos que acostumen a xantar no comedor escolar disfruten dun menú a base de peixe. Esta comida contempla a instalación previa duns paneis (tres grandes posters) que explican as propiedades do peixe, así como o reparto dun díptico a todos os rapaces ao inicio do xantar. Este ano son 14.000 estudantes de entre 8 e 10 anos, 3.000 máis que a edición anterior, pertencentes a 67 colexios de toda Galicia (15 da provincia da Coruña, 17 da de Lugo, 21 da de Ourense e 14 da de Pontevedra), os que se benefician deste proxecto.

A campaña busca vincular o feito de comer peixe a algo divertido, saboroso e, por enriba de todo, saudable, para lograr desenvolver actitudes positivas para o seu consumo. Ademais, e dado que os principias motivos do rexeitamento deste produto por parte dos nenos radica nas espiñas, a textura, o aspecto e o sabor, preténdese que os alumnos descubran novos sabores e texturas de peixe que lles permita achegarse ao pracer de comelo; coñezan o lugar onde se atopan as espiñas nas principais especies que consumen, e saiban manexar os instrumentos e técnicas que permiten separalas.

Propostas do Goberno español e accións da Xunta de Galicia
Así mesmo, a Consellería de Pesca e Asuntos Marítimos quere remarcar que as propostas que realiza hoxe o presidente do PPdG para o sector pesqueiro galego resultan ser moi inferiores ás que está a plantexar e defender España no seo do Consello de Ministros da Unión Europea, que se celebra hoxe e mañá en Luxemburgo. Estes plantexamentos son os que Galicia tamén defende e apoia..