O PPdeG reclama rapidez de reflexos ao Sergas para evitar que os especialistas que non superaron a OPE teñan que abandonar a sanidade pública

noticiasgalicia.- O voceiro de Sanidade do Grupo Popular, Miguel Santalices, fai un chamamento aos responsables de persoal do Servizo Galego de Saúde para evitar que os médicos que non superaron a recente Oferta Pública de Emprego (OPE) podan continuar traballando na rede sanitaria pública. Santalices Vieira desvela que o número de médicos que tiveron que abandonar as prazas nas que viñeron traballando ata o de agora como consecuencia da culminación da OPE se eleva a varias decenas en Galicia, xa que ese postos están a ser cubertos por facultativos que superaron o proceso selectivo. Tan só no Hospital Juan Canalejo da Coruña atópanse nesa situación entre 8 e 10 médicos de especialidades como medicina interna, cirurxía, inmunoloxía ou análisis clínicos.

A xuízo do deputado popular, as crecentes dificultades para atopar persoal facultativo no mercado debería levar aos responsables da Administración sanitaria galega a articular unha solución inmediata para manter a vinculación laboral destes profesionais co Sergas, posto que boa parte deles poderían optar de inmediato por incorporarse á sanidade privada ou aceptar os contratos que lles ofrecen outras Comunidades Autónomas. Nun contexto de elevadas listas de espera ­arredor de 300.000 persoas para consultas e sobre 60.000 para intervencións cirúrxicas- e de necesidade de profesionais para efectuar o relevo xeracional que se aveciña, non se entendería que o Sergas deixe que causen baixa na súa nómina de persoal médicos novos e de elevada cualificación profesional.

Santalices Vieira tamén cuestiona que a Consellería de Sanidade faga coincidir no mesmo período de tempo a toma de posesión dos facultativos que obtiveron praza na OPE, o concurso de traslados (en función das circunstancias persoais, os permisos por esta causa poden alongarse a preto de un mes) e as vacacións estivais. A coincidencia destes tres factores ­alerta o PPdeG- deixa baixo mínimos os cadros de persoal médico de algúns centros hospitalarios de Galicia.