CC OO denuncia que a Consellaría de Educación pretende reducir profesorado para o vindeiro curso e ameaza con mobilizacións

noticiasgalicia.- A Consellaría de Educación, a través da Inspección Educativa e do servizo de persoal, está facendo chegar aos centros información sobre a dotación do profesorado para o vindeiro curso. Segundo denuncia a Federación do Ensino de Comisións Obreiras (CC OO‹Ensino), o denominador común desta información é a redución de persoal respecto do pasado curso.

Segundo CC OO‹Ensino, a reducción do profesorado non se produce como consecuencia da reducción de grupos de alumnos, senón que a igual número de grupos ‹ou incluso incrementándose‹, "preténdese dotar p centro de menos persoal, algo inadmisible". Ao tempo, o sindicato denuncia que a decisión se adopte nun momento no que se está a cargar de máis traballo burocrático aos centros.

Repercusións desta decisión

A organización sindical explica que a redución de persoal afectará de diferentes maneiras os centros. Prexudicaría na atención á diversidade, á propia organización interna, á posibilidade de oferta de materias optativas "e mesmo na calidade do servizo educativo público", aseguran desde CC OO.

Posibles mobilizacións

CC OO‹Ensino lémbralle á Administración educativa que o Acordo de Secundaria do ano 1998 e o Acordo de cadros de persoal e horarios para o corpo de mestres asinado o 8 de xullo de 2007 "establecen unhas condicións que non poden ser alteradas de forma unilateral pola Consellaría de Educación".

Por este motivo, a Federación do Ensino comunícalle ao departamento educativo que "permaneceremos atentos ao cumprimento dos acordos". Así mesmo, os representantes sindicais advírtenlle á Consellaría que calquera incumprimento dos acordos "terá como consecuencia un inicio de curso 'quente', no que non descartamos mobilizar ao profesorado".