|
noticiasgalicia.-
A Conselleira de Pesca e Asuntos Marítimos, Carmen Gallego
Calvar, apelou ao diálogo como vía para acadar unha solución
á situación pola que atravesa actualmente o sector mexilloeiro
galego. Así o manifestou a responsable da Administración pesqueira
galega tras un encontro, celebrado esta mañá en Santiago de
Compostela, con representantes dos conserveiros, dos cocedeiros
e de parte dos produtores deste mitílido.
Gallego sinalou que a reunión de hoxe, na que tamén participou
o director xeral de Estruturas e Mercados da Pesca, José Manuel
López Rodríguez, serviu para recoller o sentir de cada unha
das partes. Ademais, destacou que o papel que pode desempeñar
o seu departamento nesta situación é o de mediación e que
dende a Consellería se seguirá traballando para buscar o achegamento
entre as partes. De feito, aínda que considerou un erro que
parte dos produtores convocados non acudisen á xuntanza de
hoxe, a Conselleira expresou o seu convencemento de que nos
vindeiros días se logrará sentar a todas as partes implicadas
na mesa de diálogo ou, cando menos, dar comezo aos contactos
bilaterais coas diferentes organizacións.
Ademais, a titular de Pesca sinalou que o obxectivo común
compartido por todos os implicados na actividade mexilloeira
é acadar un sector que xere un produto de calidade, capaz
de fornecer un recurso axeitado á demanda do mercado durante
todo o ano e que vexa repercutida esa calidade nun prezo xusto.
Na súa opinión este argumento engloba a todos as partes e
por esta razón, dende a Consellería vaise traballar para ³seguir
buscando o achegamento de posturas², afirmou Gallego.
|
