Amigos da Terra celebra a directiva europea para a protección do medio ambiente

noticiasgalicia.- Amigos da Terra celebra a decisión do Parlamento Europeo de aprobar a directiva que castigará con sancións penais delitos contra o medio ambiente. Deberá entrar en vigor en España nun prazo de dous anos e contemplará unha lista de violacións a leis ambientais que deberán considerarse "delitos criminais".

Un dos obxectivos desta directiva é que se adopten sancións penais efectivas, proporcionais e disuasorias contra as persoas, físicas ou xurídicas, que causen danos ao medio ambiente. Tamén, pretende homoxeneizar o contido dos códigos penais dos Estados membros, garantindo a existencia nos mesmos, dunha base común de delitos ambientais castigados penalmente. Este marco común para tipificar os delitos ambientais, obrigará a España a asegurarse de que as empresas poidan ser consideradas responsables das infraccións penais cometidas no seu beneficio.

Aínda que Amigos da Terra acolleu a aprobación da directiva coa esperanza de que se endurezan os castigos pola comisión dunha agresión ao medio ambiente, "plantéxanselle dúbidas sobre a correcta aplicabilidade ou sobre a trasposición en tempo por parte de España da citada directiva", explica Montse Valencia asesora xurídica de Amigos da Terra.

Con esta directiva en vigor e trasposta ao ordenamento xurídico español, é posible que casos tan graves coma o do vertido ocasionado pola empresa láctea Río ao río Tórdea causando a mortaldade de preto de 3.000 especies piscícolas en setembro de 1.999, fora sancionado con maior severidade.

Amigos da Terra lembra, respecto a este caso, que o dono e administrador da empresa foi condenado a unha pena de prisión de dous anos e inhabilitación por tres, segundo unha sentenza do Tribunal Supremo, adquirindo só firmeza a inhabilitación o que está posibilitando á defensa do empresario interpór recurso ante o Tribunal Constitucional e incluso pretenden solicitar unha petición de indulto ao Consello de Ministros.

E todo elo ante un caso evidente de delito ecolóxico que ocasionou unha merma na calidade do ecosistema acuático e a morte de miles de especies de peixes.

Similitudes polo carácter de vertido garda este caso co recentemente ocorrido en Ourense que provocou a chegada de 50.000 litros de fuel á rede de sumidoiro da cidade provintes dos depósitos da empresa Adif polo que ven de ser "amonestada" polo concello de Ourense cunha multa de 12.000 euros o que da como resultado que "verter un litro de gasoil e provocar unha ameaza a un importantisimo recurso fluvial coma é o río Miño, só custa 4 euros", afirman dende Amigos da Terra.