Á venda as entradas para os espectáculos da Mostra Internacional de Teatro de Ribadavia

noticiasgalicia.- As entradas para os espectáculos da Mostra Internacional de Teatro de Ribadavia, que se vai celebrar entre os días 19 e 26 deste mes, xa están á venda tanto na propia oficina da MIT como a través do servizo de taquilla electrónica de Caixanova.

A cinco días do inicio do festival, todo está preparado para que dúas ducias de compañías de Alemaña, Brasil, Portugal, Arxentina, Galicia e do resto de España enchan de arte o Castelo, a Igrexa da Madalena, a Casa da Cultura, as rúas da vila e os barrios do municipio.

As entradas poden mercarse xa na oficina da MIT, situada na rúa García Penedo, ao lado da praza Maior de Ribadavia. Como novidade para esta 24 edición, os tickets poden comprarse a través do servizo de venda de localidades de Caixanova, na páxina www.caixanova.es, ou no teléfono 902 504 500. Tamén se poderán mercar entradas xusto antes dos espectáculos. Para as funcións do Castelo, previstas para as 23.00h., a taquilla estará aberta desde as 21 ás 22.30h.

Quedan xa menos días para o inicio da MIT, que se abrirá o sábado 19 cun pregón a cargo da actriz María Bouzas. Este ano, a Mostra contará con 24 compañías de Alemaña, Brasil, Portugal, Arxentina, Galicia e o resto de España, en actuacións distribuídas entre o Castelo, a Igrexa da Madalena, a Casa da Cultura, as rúas da vila e os barrios do municipio.

As últimas montaxes de Familie Flöz, Camut Band, Uróc, Meridional ou Circolando, unha performance de perruquería creativa e un espectáculo só para mulleres ambientado nun baño musulmán tradicional estarán este ano entre as apostas estrela da cita.