noticiasgalicia.-Poden acceder a estas subvencións os tomadores da póliza que poderán ser ben as confrarías, as cooperativas do mar, as organizacións de produción pesqueira (OPP) ou calquera outra entidade asociativa do sector con sede en Galicia, en nome dos seus membros que pesquen en augas do litoral galego ou lindantes con Portugal e o Cantábrico.

Os beneficiarios desta iniciativa son os arrastreiros de litoral e embarcacións de cerco de litoral que traballan en caladoiros nacionais, barcos de artes menores e percebeiros a pé ou a flote. Todos eles tiveron que formalizar o pasado ano, -con anterioridade ao 1 de novembro- un seguro coa aseguradora Mapfre, entidade seleccionada para ofertar este servicio.

Pola contra, non serán obxecto de cobertura da póliza o marisqueo realizado con arte de marisqueo desde a embarcación, calquera actividade a pé diferente á de percebeiro, as embarcacións adicadas á acuicultura, as unidades que pescan en caladoiros comunitarios (altura) e internacionais (grande altura) e as embarcacións auxiliares de calquera tipo. Tamén quedarán excluídas as vedas, os paros biolóxicos, contaminación de calquera tipo e mareas vermellas, así como períodos de mantemento de embarcacións ou de descanso do persoal, o peche dun plan de explotación e a pesca deportiva e recreativa en todas as súas modalidades.

E tampouco entrarán nesta iniciativa ordenanzas e limitacións á explotación pesqueira e marisqueira ditadas polas autoridades competentes, mortandade de especies mariñas por calquera causa e calquera outra parada ou amarre temporal que non teña a súa orixe nas condicións climatolóxicas adversas.