noticiasgalicia.- A Consellería de Pesca e Asuntos Marítimos publica hoxe no Diario Oficial de Galicia (DOG) dúas ordes polas que se convocan axudas destinadas a investimentos no eido da acuicultura, por unha banda, e no ámbito da comercialización e transformación de produtos pesqueiros, marisqueiros e acuícolas, por outra.

Estas achegas son para o exercicio 2008 e a cuantía aproxímanse aos 40 millóns de euros. Así, o DOG recolle a Orde do 20 de febreiro de 2008 pola que se establece o prazo de presentación de solicitudes de axudas a investimentos no ámbito da acuicultura para este ano e se particulariza o seu importe global máximo.

Segundo esta normativa, poderán beneficiarse destas subvencións, que se aproximan aos 15 millóns de euros, aqueles proxectos rematados e xustificados antes do 1 de novembro de 2008. Poderán acceder a estas achegas as persoas físicas ou xurídicas titulares de criadeiros ou granxas mariñas, establecementos de cultivos mariños en zona marítima, parques de cultivo e establecementos en augas continentais inscritos no rexistro de centros de acuicultura, segundo a normativa vixente.

Estas entidades deberán realizar investimentos materiais nas instalacións, quedando tamén incluídas as inversións realizadas nos buques de servizos. Os establecementos deberán estar ubicados na Comunidade Autónoma de Galicia e estarán en posesión das preceptivas autorizacións ou permisos para levar a cabo os investimentos previstos ou terán que ter tramitada a correspondente solicitude.

Axudas á transformación e comercialización
O DOG tamén recolle hoxe a Orde pola que se modifican as bases reguladoras para a concesión de axudas para a realización de investimentos relativos á creación, renovación, modernización e innovación tecnolóxica das empresas de manipulación, transformación, conservación, tratamento e comercialización de produtos pesqueiros, marisqueiros e acuícolas. Así mesmo, esta normativa particulariza o devandito procedemento para 2008, sendo o montante das achegas de 25 millóns de euros.

Os investimentos debéran estar rematados e xustificados antes do 30 de setembro de 2008, mentres que os beneficiarios das subvencións poderán ser persoas físicas ou xurídicas titulares de centros produtivos xa existentes situados en Galicia. Ademais, poderán beneficiarse aquelas outras que establezan novas instalacións na nosa comunidade adicadas á manipulación, transformación, conservación e tratamento dos produtos da pesca, do marisqueo e da acuicultura. En ámbolos casos deberán estar en posesión das necesarias habilitacións administracións e os investimentos deberán efectuarse dentro de Galicia.

Presentación de solicitudes
Tanto a orde que regula as achegas para proxectos de acuicultura como a relativa a actuacións no eido da transformación e a comercialización establecen un prazo de presentación de solicitudes dun mes, contado a partires de mañá. Ademais, as dúas normativas establecen que o importe máximo das subvencións (case 15 millóns de euros para acuicultura e 25 millóns de euros para transformación e comercialización) poderá ser ampliable en función das dispoñibilidades orzamentarias sen que iso dea lugar á apertura dun novo período de entrega de solicitudes, salvo indicación expresa na orde que se publique para o efecto.

A presentación da petición de subvención por parte dos interesados comporta a autorización ao órgano xestor para pedir as certificacións que acrediten que os solicitantes están ao día nas obrigas tributarias e coa Seguridade Social e que non ten pendente de pagamento ningunha débeda coa Administracións pública galega. Por outra banda, a Consellería de Pesca e Asuntos Marítimos publicará no Diario Oficial de Galicia as subvencións concedidas ao abeiro das dúas ordes, á vez que recollerá na páxina web oficial a relación de beneficiarios e as axudas concedidas, polo que a presentación de solicitudes leva implícita a autorización para o tratamento necesario dos datos dos solicitantes.