 |
noticiasgalicia.-
Un total de 40 vivendas do barrio mariñeiro de Estribela
poderán beneficiarse das oportunidades que abre a Área de
Rehabilitación Integral (ARI). O convenio que a regula a
quinta fase foi asinado hoxe en Santiago polo tenente de
alcalde e concelleiro de Urbanismo, Antón Louro. O acto
estivo encabezado polo presidente da Xunta, Alberto Núñez
Feijoo, e a ministra de Fomento, Ana Pastor.
A quinta fase da ARI de Estribela, aprobada en 2007, aborda
así a súa quinta fase, que vai durar ata o ano 2016. Contempla
un investimento total de 3.220.659,88 euros, dos que 2.728.800
están destinados a rehabilitación de vivendas e elementos
comúns dos edificios, 200.000 euros a obras de urbanización
e 291.859,88 euros a financiar os gastos de funcionamento
da oficina de rehabilitación-portelo único.
Segundo o acordo asinado hoxe, o Concello de Pontevedra
achegará 376.859,88 euros (un 11,7%); o Ministerio de Fomento,
275.000 euros (8,54%); a Xunta de Galicia, 240.000 euros
(7,45%) e, finalmente, os beneficiarios das obras, un total
de 2.328.800 euros (72,31%). Os veciños de Estribela xa
están informados deste acordo, pois o pasado mes recibiron
unha carta asinada por Antón Louro, na que se lles informaba
da apertura da 5ª fase do programa. Como se explicaba no
texto, as axudas son a fondo perdido e ata un 75% do orzamento
protexible. O tope máximo é de 10.000 euros. O prazo para
presentar as solicitudes e a documentación necesaria remata
o 30 de setembro próxi8mo.
No ámbito protexido do barrio de Estribela hai un total
de 481 vivendas. A ARI foi declarada o 3 de maio de 2007.
Dende entón, as catro fases desenvolvidas, permitiron o
acceso ás axudas públicas para máis de 200 actuacións de
rehabilitación de vivendas, das que 167 xa están rematadas
e o resto en tramitación e/ou execución.
Ao tempo, foron reurbanizadas as rúas do Cruceiro, das Laxes
e Senén Sobral e está previsto facelo na praza Marqués de
Valterra e nas rúas da Pedralonga, do Mercado e Comboa.
En Galicia existen 44 áreas de rehabilitación repartidas
por 31 concellos. O acordo asinado hoxe en presencia dos
representantes municipais contempla un total de 2.500 actuacións
concretas de rehabilitación.
|
