noticiasgalicia.- A XXII Feira do Moble de Galicia xa rexistra o 95% de ocupación cando aínda faltan dous meses para a celebración da mesma. Prevese un éxito absoluto en canto ao número de expositores, quen lanzarán na Estrada os novos mostrarios, onde convivirán os deseños máis novos con propostas de corte máis clásico.

Durante a celebración da feira, a Fundación de Exposición e Congresos da Estrada procederá á entrega do XIII premio xornalístico Manuel Reimondez Portela, co que pretenden contribuír á difusión e fomento da cultura galega na nosa comunidade autónoma. O premio outorgarase ao mellor traballo publicado en lingua galega por calquera medio de comunicación escrito.

Ao mesmo tempo, Alba Souto García, santiaguesa de 23 anos, Licenciada en Comunicación Audiovisual pola Universidade de Vigo, recollerá durante o desenvolvemento da feira o premio que lle outorga a Fundación de Exposicións e Congresos como gañadora do VII concurso de carteis para a XXII edición da Feira do Moble de Galicia. "Non mo esperaba, foi unha sorpresa", confesaba Alba. "Para a realización do cartel busquei motivos relacionados directamente co moble, establecendo un deseño de cadeira en liñas rectas con pinceladas asiáticas que é unha tendencia actual en decoración", declaraba a gañadora.

A nova edición da Feira do Moble de Galicia será, unha vez máis, o mellor escaparate do sector no noroeste español, espertando o interese de moblistas locais e foráneos. Ademais dos expositores que habitualmente acoden á Estrada, espéranse unha alta porcentaxe de empresarios que asisten por primeira vez a este evento, dato que constata a boa saúde desta feira.