noticiasgalicia.- Vigo,
31 de agosto de 2010. Moaña e Lalín acollerán a fase final da
III Copa Deputación de Pontevedra os días 2 e 3 de setembro,
na que participarán os clubs Academia Octavio, Construcións
Paraxe Chapela, Frigoríficos do Morrazo e SD Teucro.
O conxunto redondelán logrou clasificarse para as semifinais
tras vencer ao Balonmán Porriño na final da Primeira Nacional,
mentres que os outros tres clubs entran directamente nesta fase
por ser os de máis categoría. As semifinais terán lugar o venres
día 2, no pavillón O Rosal de Moaña, en recoñecemento ao traballo
desenvolvido polo Club Balonmán Moaña co balonmán de base.
A primeira semifinal enfrontará a B.M. Octavio e Construcións
Paraxe Chapela as 19:30 horas, mentres que o Frigoríficos do
Morrazo e o Teucro xogarán a partir das 21:15 horas. A final
celebrarase en Lalín (Pavillón Municipal de Lalín) o sábado
4 de setembro a partir das 20:00 horas e o dito partido será
retransmitido pola TVG 2. Con anterioridade á gran final, terá
lugar o partido polo terceiro posto, a partir das 18:00 horas.
A fase final desta terceira Copa Deputación tivo que retrasarse
pola dificultade para facer coincidir os calendarios no tramo
final da tempada. Por este motivo, decidiuse esperar uns meses
para evitar prexudicar aos clubs implicados e que agora podan
xogar con todo o seu potencial deportivo. Esta competición é
patrocinada pola Deputación Provincial de Pontevedra e organizada
pola Federación Galega de Balonmán, quen agradece a aposta que
a Deputación fai por este deporte.
O orzamento do torneo é de 35.000 euros e os equipos recibirán
un fixo de 1.100 euros por cada partido disputado. Na Copa Deputación
participaron os equipos Bm. Lalín, Bm. Porriño, Bm Chapela,
Gaeva 2000 Bueu At, Peguform S.A.R., Cisne, Novás, Frigoríficos
do Morrazo, Academia Octavio e Teucro.
|
