 |
noticiasgalicia.- O presidente
do PP de Pontevedra e da Deputación, Rafael Louzán, anunciou hoxe unha
proposta para unificar as taxas de recollida de lixos dos municipios
de menos de 25.000 habitantes que realizan a recollida directamente
ou teñen a concesión a piques de caducar. Louzán xustificou esta equiparación
nas diferenzas entre municipios limítrofes, con diferenzas moi acusadas,
''nalgúns casos do 100%'', dixo.
Non explicou como se realizará esta equiparación, pero recoñeceu que
''ningún concello pensa en baixar as taxas'' e puxo como exemplo a
Barro, onde subiu de seis a 60 euros, segundo os seus datos. O presidente
provincial ha sinalado que a Deputación, a través do Organismo Autónomo
de Xestión de Recursos Locais (Oral), leva meses estudando a cuestión.
Aínda que deixou claro que a autonomía é dos propios municipios, sinalou
que no ''medio prazo'' os 47 concellos do PP na provincia chegarán
a un acordo. Sinalou tamén que o servizo é xeralmente deficitario e
que ''non cobre o 50% do custo'', e dixo que unha xestión mancomunada
-que non aclarou se será pública ou privada- permitiría aforrar o 50%
dos vehículos e o persoal. Engadiu, no entanto, que os traballadores
serían destinados a outras funcións.
Entre os exemplos de concellos similares con taxas diversas citou os
casos de Arbo e Crecente (15 e 30 euros, respectivamente); Tomiño e
A Guarda (15 e 62) ou Poio e Vilaboa (108 e 34). Louzán eloxiou tamén
a subida do IBI aprobada polo Goberno central e asegurou que non se
pretende ''crear máis carga tributaria'' senón buscar a ''equidade''.
|
