|
noticiasgalicia.-As
comarcas do Deza e Tabeirós Terra de Montes son dous dos destinos máis
solicitados polos cidadáns da provincia de Pontevedra que participan
na iniciativa impulsada pola Deputación «Coñece a túa provincia». O
mellor exemplo son as 7.311 persoas que dende o ano 2009 se desprazaron
ata Lalín para coñecer a «Ruta de Mouriscade» e as 1.335 persoas que
o pasado 2011 visitaron Cerdedo para coñecer a denominada «Ruta Arqueolóxica».
Un total de 8.646 persoas. Con esta iniciativa, que a Deputación puxo
en marcha de forma pioneira en Galicia no ano 2008, a entidade provincial
contribúe a desestacionalizar e a promocionar o turismo do interior
e a fomentar o consumo e o dinamismo comercial neste caso dos municipios
de Lalín, Cerdedo e das súas áreas de influencia.
Compre salientar que na primeira edición da iniciativa a Deputación
deseñou unhas rutas experimentais centradas na comarca de Pontevedra.
Non obstante, en vista do éxito a Deputación impulsou no 2009 a Ruta
de Mouriscade e o pasado 2011 a Ruta Arqueolóxica que achega ós cidadáns
ata o entorno natural e patrimonial de Cerdedo. A través desta iniciativa,
a Deputación de Pontevedra contribúe ó mantemento dos empregos directos
en sectores estratéxicos da comarca como son a hostalería, o comercio,
a artesanía, e o turismo, entre outros. Así, para levar adiante este
proxecto a Deputación conta coa participación dos negocios, museos,
e distintos establecementos de interese das distintas zonas.
Así por exemplo a Ruta de Mouriscade contempla a visita dos excursionistas
ó laboratorio e á Finca Mouriscade(cun percorrido panorámico en autobús
por toda a finca, pasando polo centro de discapacitados, club de hípica
e albergue para peregrinos); unha visita ó Museo Etnográfico Ruta do
Patron; o almorzo no Restaurante Casa Pablo; e unha visita ó Museo
Ramón María Aller. Ademais dentro desta ruta, se ofrece a posibilidade
de percorrer as distintas instalacións da fábrica de queixos ³Pazo
de Anzuxao² cunha charla acerca dos procesos de fabricación dos diferentes
tipos de queixo e, posteriormente, son degustados; e finalmente pola
tarde os excursionistas visitan a localidade de Lalín. Pola súa banda,
a Ruta Arqueolóxica inclúe unha visita a Campo Lameiro e ó seu parque
arqueolóxico e posteriormente o desprazamento ata o municipio de Cerdedo
onde se visitan a Capela de San Antonio, as vías romanas, a zona máis
céntrica da vila e outros puntos de interese.
|
