 |
redacción.-
A nova colección
pictórica do artista Alberto Badía encherá o primeiro andar
da Praza de Abastos coas cores do sudeste asiático. A exposición
"Vietnam in my hands Camboya in my eyes..." estará
aberta entre os próximos 2 e 16 de febreiro e poderá visitarse
en horario de mañá, de 9 a 14 horas.
A oferta foi presentada pola concelleira de Promoción Económica,
Carlota Román, acompañada do pintor vigués e do presidente
da Asociación de Bulimia e Anorexia de Pontevedra, Juan
Ramón Pérez. Os beneficios da venda do catálogo da exposición
irán a esta asociación.
A concelleira destacou que esta é unha primeira iniciativa
para explorar novas vías coas que dinamizar o Mercado de
Abastos. Hai que dotalo de novos contidos con tirón que
sirvan para achegar ao cidadán a este edificio máis alá
da súa función tradicional, afirmou Román. A súa intención,
a medio prazo, é diversificar a oferta, ofrecendo usos alternativos
á compra-venda de alimentos, pero para elo precísase abordar
previamente unha reorganización dos espazos que permita
liberar o primeiro andar. A exposición de Alberto Badía
permitirá contemplar e adquirir 16 obras que reflicten "momentos
conxelados" do paso do artista por Vietnam e Camboya,
nunha viaxe de busca persoal durante tres meses remontando
o río Mekong. As obras, impresas sobre dibond (soporte aluminio),
están marcadas polos trazos de os debuxos que se fusionan
coa utilización das novas tecnoloxías.
A profusión de cores planas ensambla á perfección coa frialdade
do aluminio, explorando un novo enfoque da técnica do collage.
Alberto Badía explicou que durante a súa viaxe visitou numerosos
mercados, cheos de balbordo e de xente que, ao igual que
as peixeiras galegas, loita e traballa duro para gañarse
a vida. As cores, os olores, os reflexos son cousas que
tamén aprecia no propio Mercado de Pontevedra. É un edificio
que me encanta, subliñou. E de aí xurdiu a idea de montar
a exposición na Praza de Abastos. Será, recalcou, a primeira
vez que expoña a súa obra fóra dunha sala de exposicións.
A exposición está montada de tal xeito que os cadros se
integran nos postos baleiros, polo que o primeiro andar
compaxinará durante estes días a actividade propia da venda
das froitas e verduras coa contemplación da obra de Badía.
Un vídeo documental de 12 minutos acompaña a mostra a modo
de resumo das vivencias do artista.
O documental pasarase de xeito permanente e como complemento
das obras expostas. O acto inaugural contará con música
en directo do músico Gonzalo Arca. Ex "Sugar Mountain"
vén de iniciar a súa carreira en solitario. Presentará temas
inéditos do seu último traballo "Rock&Soul en estado
puro". O catálogo benéfico que se pode adquirir na
mostra reúne as obras exhibidas con comentarios do artista,
a memoria da viaxe, unha selección das fotografías tomadas
na ruta e a nota de autor. Nel tamén colaboraron o músico
Teo Cardalda, os pintores John Weeden e Sandra Llanas, xunto
con profesionais da comunicación como Beta Álvarez (directora
de Moda de Esquire), Vera Bercovitz (Vanity Fair) e a italiana
Laura Bertaglia.
Juan Ramón Pérez agradeceu esta idea, que cualificou como
moi orixinal, e desexou os maiores éxitos á exposición porque
iso significará tamén un ingreso moi valioso para a Asociación
de Anorexia e Bulimia de Pontevedra. Alberto Badía é un
viaxeiro incansable que ten pasado na súa traxectoria vital
por Londres, Jamaica, Bahamas, México, Holanda e Miami.
Retornou a España en 1996, momento en que un destacado galerista
catalán adquiriu a totalidade da súa obra, sempre de aire
impresionista. Na súa produción pictórica destacan coleccións
recentes con obras de gran formato expostas en España e
Portugal: "Monografía", "Noches en vela",
"Games", "Special waste" y "Especímenes".
|
