 |
noticiasgalicia.-
O Pleno aprobou definitivamente nunha
sesión extraordinaria, cos votos favorables do grupo do Goberno e o
negativo dos dous grupos da oposición, a modificación do cadro de persoal
de 2011, unha vez estudadas e rexeitadas as alegacións presentadas.
A concelleira de Persoal, Amelia González, explicou que a modificación
do cadro de persoal tiña os informes favorables respectivos. Neste
sentido, indicou que a creación de tres postos de habilitados estatais
de apoio -tesoureiro, interventor e secretario- non está suxeita á
negociación colectiva nin á taxa de reposición de efectivos.
Na súa intervención de peche, o alcalde, Xerardo Conde Roa, recordou
que ata agora o Concello dispoñía no seu cadro de persoal de seis prazas
de habilitados estatais: tres interventoras, un secretario do Pleno,
un secretario da Xunta de Goberno e un tesoureiro. Ademais, denunciou
o ingreso neste cadro por sentenzas xudiciais de ata 20 traballadores
nos últimos anos e o abundante número de interinos. Os gastos de todos
estes supoñen uns dous millóns de gasto anual. A outra modificación
do cadro de persoal tiña que ver coa regularización das direccións
de área de Facenda e de Mobilidade. Esta última queda establecida como
un cargo directivo, e non como persoal funcionario, tal como se reflectía
ata agora.
As direccións de área son figuras reservadas para os municipios acollidos
á Lei de Grandes Cidades. A concelleira de Persoal lembrou tamén que
o custo das novas prazas vai ser inferior ao aforro que se producirá
en toda a lexislatura pola redución de asesores e dedicacións exclusivas
xa decretada. Así, as cinco prazas de asesores e tres de dedicacións
exclusivas minoradas, sumadas a praza de director da área de Mobilidade
modificada, suporán un aforro estimado en toda a lexislatura de preto
de dous millóns de euros, segundo indicou.
|
