 |
noticiasgalicia.-O
Concello de Santiago e Kalandraka Editora convocan o V Premio InternacionalCompostela
de Álbums Ilustrados, dotado con 9.000 euros para o mellor traballo
en concepto de adianto polos dereitos de autor.
O alcalde compostelán, Xerardo Conde Roa; o concelleiro de Educación,
Ángel Currás, e o xerente de Kalandraka Editora, Xosé Ballesteros,
presentaron esta nova convocatoria.
O prazo de presentación dos traballos rematará o 2 de marzo de 2012
e o fallo do xurado darase a coñecer en torno ao 2 de abril, no marco
do Día Internacional do Libro Infantil e Xuvenil e das actividades
da XII Campaña de Animación á Lectura do Concello de Santiago. Conde
Roa referiuse aos álbums ilustrados como un "instrumento cada vez máis
interesante para a animación á lectura" e resaltou "proxección internacional"
que o Premio lle outorga a Santiago. Á dimensión formativa tamén se
referiu o concelleiro de Educación, afirmando que o álbum ilustrado
é "o primeiro contacto dos máis pequenos con mundo do libro e un instrumento
fundamental na aprendizaxe e para o fomento do hábito da lectura".
"É unha honra ter un premio destas características", dixo.
Pola súa parte, o xerente de Kalandraka felicitouse por que un certame
coma este se manteña malia as dificultades económicas. Expresou o seu
desexo de que, como en edicións anteriores, "a participación sexa masiva"
e de aí saía "un novo éxito. Indicou que se está configurando o xurado,
o cal contará con "grandes nomes da ilustración española". O Premio
Internacional Compostela está dirixido a autores e ilustradores de
calquera nacionalidade que presenten obras orixinais e inéditas, escritas
en calquera das linguas oficiais da Península Ibérica. As persoas interesadas
en presentarse ao certame deberán enviar cinco copias do texto, tres
ilustracións orixinais e cinco fotocopias en cor de cada unha delas,
xunto cunha maqueta acabada de todo o proxecto.
O material, asinado baixo lema ou pseudónimo, enviarase ao Rexistro
Xeral do Concello de Santiago (rúa do Presidente Salvador Allende,
4, 15705 Santiago de Compostela). Kalandraka publicará a obra premiada
nas cinco linguas oficiais peninsulares -galego, castelán, catalán,
éuscaro e portugués- así como en inglés, en outubro de 2012. A editorial
poderá publicar tamén os traballos que reciban unha mención especial.
O xurado estará formado por profesionais de recoñecido prestixio no
eido da literatura e da ilustración infantil. As bases completas de
participación no V Premio Internacional Compostela pódense consultar
nesta mesma páxina web e na de Kalandraka.
Álbums gañadores
A gañadora da primeira edición do Premio Internacional Compostela -ao
que se presentaron 335 traballos- foi a arxentina Natalia Colombo,
autora e ilustradora da obra titulada Cerca. Na convocatoria de 2009
-á que optaban 280 aspirantes- o mexicano Felipe Ugalde recibiu o galardón
por Un gran soño. O autor Pep Bruno e a ilustradora Mariona Cabassa
foron distinguidos na terceira edición polo libro A familia C, que
competiu con outras 518 obras. O uruguaio Martín León Barreto gañou
a convocatoria de 2011 co álbum A viaxe de Olaf, seleccionado entre
374 traballos procedentes de 19 países. A convocatoria deste certame
encádrase na Campaña de Animación á Lectura que o Concello de Santiago
e Kalandraka organizan anualmente no mes de abril, e que en 2012 chegará
á súa duodécima edición. As actividades programadas -sesións de contos
e música, obradoiros de ilustración e de escrita creativa, actos nas
librarías da cidade, charlas para docentes e familias- chegan a máis
de 5.000 escolares da bisbarra compostelá.
Condolencias O alcalde iniciou a comparecencia expreando as súas condolencias
e as da Corporación cos familiares das vítimas do accidente acontecido
na praia coruñesa do Orzán, así como a súa solidariedade coa cidade
da Coruña nestes difíciles momentos.
|
