|
noticiasgalicia.-
. O Departamento de Benestar, dirixido
por Ignacio Iglesias, vén de facer público o programa de actividades
dirixido ás persoas maiores para os vindeiros meses. Na oferta presentada
"hai unha liña de continuidade con talleres que xa se viñan realizando
xa que existe unha participación e unha demanda que consideremos moi
interesante manter" explica o edil de Benestar. O prazo para anotarse
nos talleres comeza o 1 de febreiro e remata o 20 de febreiro. Para
inscribirse en calquera das actividades, que son gratuítas, só hai
que achegarse ó departamento de Servizos Sociais na Ramallosa ou chamar
ó teléfono 981 809 707. Está previsto que a maioría das actividades
comecen no mes de marzo.
Os talleres que se planificaron, ademais de atender a diferentes temáticas
tamén se ofertan en diferentes parroquias, evitando a centralización
excesiva. Os martes entre as 17:00 e as 18:30 horas haberá clases de
pintura na escola de Lucí. Os mércores impártense manualidades entre
as 17:00 e as 18:30 horas na Casa Común da Torre (Cacheiras). Os xoves
hai obradoiro de envellecemento activo para os veciños de Calo e de
Recesende. Será no local social de Calo entre as 17:00 e as 18:30 horas
e no local social de Recesende entre as 19:00 e as 20:30 horas. Os
venres no local sociocultural da Ramallosa haberá clases de bolillos
entre as 17:00 e as 18:30 horas. Os últimos sábados de mes farase unha
excursión do programa "Coñece o teu País" aínda que para
asistir ás excursións hai que anotarse na primeira quincena de cada
mes.
Segundo informan dende Benestar está previsto iniciar dende mediados
de abril outro Obradoiro de envellecemento activo nas parroquias de
Teo e Rarís, así como ximnasia terapéutica no CSC da Ramallosa. As
persoas interesadas nestas actividades poden anotarse xa aínda que
non comezaran de xeito inmediato. Para participar nos talleres ofertados
hai que estar empadroado no Concello e ter máis de 60 anos ou máis
de 50 anos se xa é pensionista. Respecto da admisión nas actividades
terán prioridade as persoas de máis idade; en segundo lugar aquelas
que sendo pensionistas teñan máis de 50 anos e en terceiro lugar as
persoas que non teñan asistido no ano anterior a estas actividades.
No caso de que existan vacantes poderanse admitir persoas que non cumpran
os requisitos anteriores.
|
