 |
noticiasgalicia.-
O Foro de Directores de Hotel reuníuse
esta mañá no Hostal dos Reis Católicos para analizar asuntos relacionados
cos principais obxectivos deste grupo de traballo que pretende por
a disposición dos decisores públicos todo o coñecemento e a experiencia
do sector privado. Polo que se refire ao Grupo de Promoción de Lavacolla,
onde colaboran Hostelería Compostela, Concello e Cámara de Comercio,
os membros do Foro falaron da necesidade de promover a especialización
turística e de negocios do aeroporto de Lavacolla, aproveitando a proxección
exterior de Santiago e do fenómeno Xacobeo, unha marca plenamente consolidada
e actualmente en alza, como demostra a evolución dos datos de peregrinos
chegados a Compostela nos últimos meses. Neste sentido Hostelería Compostela
quere chamar a atención sobre a importancia de aproveitar as vantaxes
para a conectividade internacional que o aeroporto de Santiago ofrece
para toda Galicia dende o punto de vista dos usuarios, con máis frecuencias,
conexións e mellores prezos e dende o punto de vista turístico, polo
que é esencial consolidar as conexións existentes e diversificar a
oferta actual con enlaces con outras compañías de baixo custo e tradicionais.
Tamén se analizaron as liñas de colaboración con Turgalicia para realizar
diferentes viaxes de familiarización, en colaboración cos hoteis que
pertencen a Hostelería Compostela, no que se bota en falla a presenza
de operadores internacionais e xornalistas, e as accións formativas
en materia de novas tecnoloxías e reputación online que se van desenvolver
nos vindeiros meses en colaboración co Concello de Santiago para mellorar
a alta calificación do destino a nivel de grao de satisfacción dos
clientes nos establecementos de hospedaxe e restauración. Os diferentes
grupos de traballo do Foro de Directores de Hotel deron conta de varias
accións desenvolvidas no eido da promoción, colaborando con outras
administracións, como a Campaña Compostela Destino Cinco Estrellas
presentada recentemente en Fitur, ou diferentes ideas para a promoción
de Santiago como destino de Turismo de Congresos, Turismo Senior, Turismo
Accesible, Turismo Académico e Idiomático, Turismo Deportivo e outras
accións promocionais imaxinativas e impactantes para tratar de contribuir
á desestacionalización turística de Santiago de Compostela e Comarca.
O Foro de Directores de Hotel tamén analizou os datos de ocupación
hoteleira nos últimos meses nos establecementos de Santiago e destacou
a importancia que cobra actualmente o fomento do turismo internacional
para mellorar estes datos e os índices de rendibilidade hoteleira,
contribuíndo á desestacionalización turística e á reactivación económica
de Galicia e de Santiago, que é a principal porta de entrada a Galicia
do turismo internacional e a cidade galega con maior proxección internacional
e co maior grao de especialización turística. Neste sentido fixeron
unha análise dos datos de ocupación nos últimos anos e puxéronos en
relación cos datos de tráfico aeroportuario de Lavacolla, que é o único
aeroporto de Galicia que medra a pesar de ser o que recibe menos diñeiro
público para os patrocinios publicitarios que fomentan a conectividade
aérea de baixo custo.
Nos vindeiros días, Hostelería Compostela vai facer unha valoración
dos datos do ano 2011 e das perspectivas de cara ao 2012. Os directores
dos hoteis están moi preocupados polas tendencias negativas que o sector
turístico de Galicia está a manter nos últimos meses, e que contrasta
co enorme potencial de internacionalización do sector turístico que
Galicia posúe grazas á enorme proxección exterior de Santiago de Compostela
e dos Camiños de Santiago, unha marca plenamente consolidada que debe
ser mellor aproveitada por parte das administracións, fomentando a
conectividade aérea internacional de Lavacolla e a complementariedade
cos outros dous aeroportos de Galicia, cunha estratexia coherente,
racional e dominada por unha lóxica empresarial e de país, máis aló
de localismos e de políticas de curto prazo. Neste sentido o Foro de
Directores pon todo o seu coñecemento, información e experiencia do
sector turístico a disposición das Administracións para orientar as
decisións que poidan conducir ao deseño dunha política aeroportuaria
única e optimizadora de recursos, que aproveite todo o potencial das
infraestruturas aeroportuarias que posúe Galicia, convencidos de que
o turismo pode e debe protagonizar a recuperación económica de Galicia
grazas ao seu enorme potencial de internacionalización.
|
