|
noticiasgalicia.- O
concello de Vedra acolle os días 4, 5, 11 e 12 de febreiro as V Xornadas
de Formación e Mostra Audiovisual LAV 012, organizadas pola Asociación
Cultural Senunpeso. Nas xornadas de formación, consolidadas como unha
das principais alternativas de formación audiovisual non regrada en
Galicia, están esgotadas as prazas en todos os cursos agás en tres,
nos que aínda é posible matricularse: animación stop motion, storyboard
e taller de curtas dirixido a alumnado da ESO.
O LAV 012 é tamén un punto de encontro entre profesionais e afeccionados
ao audiovisual a través da mostra de curtametraxes e as conferencias
programadas. Conferencias As conferencias son un dos elementos máis
atractivos da presente edición do LAV012. Están programadas tres conferencias
abertas a todo o público que serán transmitidas en streaming online
a través da web www.senunpeso.org. O sábado 4 ás 19:45 h, a produtora
Fernanda del Nido (Tic Tac Producciones, produtora de 18 comidas ou
Tralas luces) falará de "Como facer visíbibel o meu proxecto"
unha introdución aos materiais xerais para presentar un proxecto e
aos cursos, obradoiros e laboratorios para desenvolvelos. O domingo
5 ás 18h o especialista en márketing e comunicación Iñaki Quenerapú
ofrecerá a conferencia "Vivir na nube², na que falará dos cambios
que se aveciñan na maneira de traballar en internet co novo paradigma:
"a nube".
A última das conferencias será a que o coñecido actor e narrador oral
Avelino González ofrecerá o sábado 11 ás 19:45h. Co título "Hai
que saberse o texto?", falará de como un actor ou unha actriz
prepara unha secuencia e en que medida ser fiel ao guión. Todas as
conferencias terán lugar no Salón de Actos da Casa da Terceira Idade
de Vedra. Estreas audiovisuais A mostra audiovisual volve nesta quinta
edición presentar proxectos recentes de novos creadores galegos. A
programación ábrese o sábado 4 ás 20:30 coa presentación do libro Galicia
en clips, un texto de Fernando Fernández Rego e Pablo Portero que repasa
a historia.
|
