|
noticiasgalicia.-
O reitor da USC , Juan Casares Long, desbota a estabilización
dos 17 investigadores do programa Parga Pondal como tiña
comprometido e prevé deseñar "novos indicadores estruturais"
para sacar a concurso novas prazas de persoal docente investigador
(PDI) no futuro.
Casares Long informou que non ten intención de cumprir co
compromiso de estabilización vixente cos investigadores
e que os seus plans pasan por deseñar novos indicadores
estruturais para identificar as áreas do coñecemento nas
que se sacarán no futuro novas prazas de persoal docente
investigador (PDI). O reitor da USC, que non atende unha
petición de reunión feita polos investigadores do programa
Parga Pondal para abordar a nova situación, non parece ouvir
ao Consello de Goberno, que aceptou os recursos destes investigadores
e deixou sen efecto a decisión da Consello de Goberno extraordinario
do 29 de novembro de estabilizar só 5 dos 17 IPP que concluíron
o seu contrato en decembro de 2011. Os investigadores do
programa Parga Pondal denuncian que o reitor, e o seu equipo
de goberno, non fixeron ningunha proposta para resolver
a estabilización deste colectivo, nin daqueles IPP e Ramón
y Cajal (RyC) que finalizarán o contrato a finais de 2012.
"É preciso non dilatar máis o programa de estabilización.
Está en xogo unha subvención de dous millóns de euros, xa
que a Xunta de Galicia asegura durante tres anos, mediante
o programa Manuel Colmeiro, o custo total dos contratos
estables de IPP avaliados positivamente que se asinen antes
do mes de xuño.Por este motivo, o equipo reitoral debe asumir
xa os compromisos adquiridos cos IPP/RyC e non ligar a súa
estabilización aos novos criterios estruturais que se definan
a partir de agora, cando os 17 investigadores xa superaron
a súa propia avaliación", explican os afectados. Para facer
efectiva a estabilización, os Parga Pondal amósanse dispostos
a estudar as mellores opcións para a USC.
Rigor e responsabilidade
A plataforma USC Futuro, que agrupa aos dous colectivos
afectados, está disposta a colaborar có equipo reitoral
no deseño deses indicadores estruturais, pero coa condición
de que o reitor asuma os compromisos de estabilización dos
IPP/RyC, que xa no seu día responderon aos criterios estruturais
definidos. Ademais, dende a plataforma abundan na necesidade
de ser rigorosos e actuar con responsabilidade dentro da
USC. "A estabilización de docentes investigadores IPP/RyC
non se pode decidir cada ano botando unha moeda ao aire,
redefinindo criterios estruturais sen buscar un consenso
entre os diferentes colectivos e plataformas da comunidade
universitaria. Os criterios e indicadores que se definan
agora deben servir para a captación de novos IPP/RyC, e
non para limitar o número de estabilizacións de IPP/RyC
captados seguindo os anteriores criterios estruturais" apuntan
dende a plataforma USC Futuro.
|
