 |
noticiasgalicia.-
O portavoz
municipal do BNG, Santi Domínguez, e a deputada no Parlamento galego,
Carme Adán, manifestaron este xoves a preocupación dos e das nacionalistas
polo futuro do Marco. Na súa comparecencia presentaron diversas iniciativas
que reclaman á Xunta de Galiza o seu compromiso coa viabilidade do
museo vigués cunha programación atractiva e de calidade, como viña
desenvolvendo ata a actualidade.
Santi Domínguez destacou o traballo feito a prol da cultura nos catro
anos anteriores, cando o BNG impulsou a rede museística da cidade,
da que o Marco "é unha peza fundamental". Neste sentido salientou
a revitalización do Museo Quiñones de León como Museo da Cidade, a
apertura da Pinacoteca, a musealización dos xacementos de O Castro
e Toralla e o inicio do Centro Galego de Fotografía. "Non entendemos
como se están dilapidando millóns na Cidade da Cultura e dende a Xunta
se deixa esmorecer a este museo², denunciou o portavoz municipal do
BNG. Criticou tamén que da Secretaría Xeral de Cultura ³non sabemos
nada, despois de que Novagalicia Banco anunciara a súa marcha do Padroado".
O nacionalista tamén fixo referencia a publicación hoxe do peche do
Museo Liste. Asegurou que os museos son "elementos moi importantes
no desenvolvemento dun pobo, pero tamén en canto á recuperación económica
no eido da cultura e na atracción turística". Ao seu xuízo, "en
tempo de crise, apostar pola cultura é apostar pola economía e polo
emprego". Carme Adán, nesta liña, criticou que a Fundación Cidade
da Cultura prevé manexar uns orzamentos de máis de 17 millóns de euros,
"e pola contra pon trabas para facer a achega de 160.000 euros
ao Marco². Segundo a deputada nacionalista, é unha cifra similar a
todo o que gasta o goberno galego para atender arquivos, bibliotecas,
museos e equipamentos culturais.
"Neste momento todos os cartos están sendo enterrados na Cidade
da Cultura, que non ten nin proxecto", criticou. A deputada do
BNG salientou o papel que xoga o Marco como dinamizador da vida cultural
de Vigo a través do seu programa de exposicións e actividades. Nese
sentido destacou as máis de 110.000 visitas que recibiu o museo no
2011, converténdose en referente no só da cidade, senón de Galiza e
o resto do estado. "Queremos saber se a Secretaría Xeral de Cultura
vai garantir a viabilidade do Marco cunha programación de calidade",
subliñou. En resposta aos medios, Carme Adán referiuse tamén a evolución
do orzamento do museo dende 2009, ano no que contou con 300.000 euros.
Asegurou que o goberno galego reduciu drasticamente as súas achegas
e criticou que mesmo ³a finais de 2011 o goberno galego aínda non fixera
a achega correspondente a ese ano, ou ben por mala fe política ou por
mala xestión²".
|
