Carta alcalde de Redondela
Sr./a Alcalde/sa,
O Parlamento de Galicia aprobou no ano 2004 o Plan Xeral de
Normalización Lingüística por unanimidade de tódolos grupos
políticos. Ese instrumento manifesta, pois, a vontade dos
nosos representantes populares na consecución dos obxectivos
que nel aparecen recollidos e, por extensión, de amplísimos
sectores da sociedade galega.
Correspóndenos, en primeiro lugar, aos poderes públicos tomalo
como referencia para desenvolver cantas iniciativas sexan
posibles para dinamizar o proceso de normalización lingüística.
Por esta razón, o Concello de Redondela, a Secretaría Xeral
de Política Lingüística e a dirección da TVG, acordamos facer
unha convocatoria ao resto dos concellos galegos e nomeadamente
ás comisións organizadoras de festexos populares para conseguirmos,
entre todos, que eses espazos de lecer reflictan e potencien
a nosa cultura e lingua.
Considerando que en Galicia se organizan anualmente máis de
sete mil festas e que éstas representan un custo elevadísimo
de centos de miles de millóns de euros, xusto é que ese caudal
económico se destine a potenciar os nosos valores culturais
xerais e os particulares de cadanseu concello e parroquia.
Deste xeito estaremos poñendo en valor o noso patrimonio cultural
e transmitíndollelo á cidadanía de noso e aos que acuden desde
outras latitudes xeográficas a disfrutaren desas programacións.
As festas populares, unhas de carácter relixoso e outras gastronómicas
ou de reivindicación histórica, son o marco ideal para afondar
na nosa peculiar identidade; E esas oportunidades debémolas
aproveitar, porque concitan o interese popular, e a través
delas podemos tecer a urdime dunha conciencia galega que está
a ser erosionada por hábitos e costumes foráneos derivadas
das programacións festivas. Galicia precisa, pois, de moitas
pedagoxías para impedirmos que os efectos da globalización
dilúan a nosa personalidade cultural.
Velai porque o/a invitamos a Vde., ou persoa en quen delegue,
a participar na asemblea de concellos galegos que se celebrará
na Vila de Redondela o próximo día 4 de abril venres ás 12.30
horas no Auditorio Municipal, situado no Paseo da Xunqueira
(detrás da Casa do Concello), no que se procederá a asinar
unha Declaración Conxunta a partir dos fundamentos recollidos
no díptico que adxuntamos. Agradézolle que nos comunique a
súa vontade de participación enviándonos un correo electrónico
a mailto:redondela@comunired.com ou cultura@redondela.es ou
chamando ao teléfono 986 400 013, xa que ao remate do acto
o Concello ten previsto convidar aos asistentes a un xantar.
12/03/08
|
|
|
|
|
