 |
noticiasgalicia.-O
portavoz municipal do BNG, Santi Domínguez, valorou este venres "os
xestos" do goberno local sobre os orzamentos municipais para 2012,
en concreto o anuncio de que o documento será presentado aos grupos
políticos con representación municipal na xunta de portavoces. Aínda
que o nacionalista valorou eses xestos positivamente, considerou que
"neste momento son insuficientes" e propuxo que os ingresos
previstos polo incremento do recibo do IBI, cifrado en máis de 5 millóns
de euros, sexan destinados á partida específica para a creación de
emprego.
"Temos claro que os 5,3 millóns teñen que ir para crear emprego
nesta cidade e non é hora de buscar outra ubicación", asegurou
Santi Domínguez. Ao seu xuízo, "é hora de que o que van pagar
os vigueses e viguesas polo IBI repercuta directamente nos propios
vigueses e viguesas, e a mellor maneira é na creación de postos de
traballo", insistiu. Neste sentido asegurou que os datos publicados
hoxe "nos dan a razón², ao demostrar que non había ningún motivo
para presentar uns orzamentos "á baixa", é dicir, inferiores
aos de 2011. O portavoz municipal do BNG dixo que a formación nacionalista
valora que se están "dando pasos para iniciar a negociación sobre
os orzamentos". Sinalou ao respecto que "parece que as cousas
comezan a facerse de xeito normal e razoable", en tanto que os
nacionalistas "consideramos normal e razoable que os grupos da
oposición se enteren do documento na xunta de portavoces para que despois
as distintas forzas poidan emitir as súas opinións".
Porén, considerou que eses pasos aínda son "insuficientes"
xa que se ben o BNG pediu que o documento fora presentado en xunta
de portavoces, tamén reclamou o cumprimento de acordos plenarios, "que
a día de hoxe non están cumpridos", puntualizou. "Agardamos
que o alcalde siga nesta liña de rectificación², manifestou. O portavoz
nacionalista asegurou que no talante do BNG está ³colaborar co goberno
local para que Vigo teña orzamentos e que ese documento poida paliar
as consecuencias da crise". Destacou que a situación económica
e social de Vigo é "moi preocupante", tal e como segundo
o nacionalista se reflectía nas caras das persoas que onte participaron
na manifestación do naval. Apuntou que á situación preocupante do naval
súmanse outros sectores, como o do pequeno e mediano comercio e a automoción,
o que provoca o aumento das familias cos seus integrantes en paro e
que se ven na necesidade de recorrer aos servizos sociais. Para paliar
esta situación, o portavoz municipal do BNG indicou que ademais de
incluír unha partida específica para emprego superior a 5 millóns,
o incremento dos ingresos deben dedicarse a partidas de prestacións
sociais, como becas de libros e comedores. "Son as liñas que sempre
planteamos, e agora non hai ningunha desculpa para que non se cumpran
esas premisas", subliñou. Ademais, defendeu que "tamén é
hora de que nun momento de crise impere a claridade, a transparencia
e o control rigoroso dos gastos orzamentarios".
Ao respecto instou á creación dunha Mesa de Emprego, formada por integrantes
das forzas políticas con representación municipal e os sindicatos e
na que se controle "o número de postos de traballo creados e as
súas condicións". Segundo o nacionalista, "se esta é a liña
do goberno local, o BNG non vai ter ningún problema en que esta cidade
teña orzamentos", e para acadalo, apelou "á responsabilidade
tanto do goberno como do PP". Neste sentido fixo un chamamento
aos concelleiros e concelleiras do PP vigués a instar á Deputación,
á Xunta e ao goberno central a mudar a súa actitude discriminatoria
e propiciar que a cidade poida saír da grave situación na que se atopa.
"Agora non teñen desculpa xa que teñen tres gobernos amigos",
sinalou .
|
