miércoles 8/12/21
OPEN DE ESPAÑA DE TAEKWONDO. Pontevedra

Os mellores taekwondistas do mundo compiten no Open de España buscando praza para as Olimpíadas de Río

Pontevedra acollerá entre os días 10 e 12 de abril o Open de España de Taekwondo, que reunirá a máis de 2.500 persoas de 50 países do mundo.

Pontevedra acollerá entre os días 10 e 12 de abril o Open de España de Taekwondo, que reunirá a máis de 2.500 persoas de 50 países do mundo. O Open de España, da categoría G-1, é a proba de taekwondo de maior nivel deportivo que se celebra en España e nesta oportunidade batéronse todos as previsións, xa que se esperaban uns 1.500 deportistas e hai máis de 2.300 (1.257 participantes en combate, 464 en técnica, 654 técnicos, 60 árbitros, 40 persoas de organización).


O evento celebrarase en Pontevedra por delegación de WTF, ETU e da Real Federación Española de Taekwondo. A presentación oficial contou hoxe coa presenza do alcalde, Miguel Anxo Fernández Lores; o concelleiro de Deportes, Agustín Fernández; o presidente da Federación Galega, Juan Carlos Eiriz; a directora do Centro Galego de Tecnificación, Helena Fernández e o presidente do Mace, Miguel Cortegoso.


Todos os afeccionados ao taekwondo poderán gozar cun evento no que é posible contemplar as diferentes modalidades (exhibición, técnica, combate e freestyle) e aos mellores especialistas principalmente en Combate absoluto, xa que hai en xogo puntos para o ránking mundial, e cos Xogos Olímpicos de Río no horizonte. Desta forma, entre os inscritos hai xente tan destacada coma os medallistas olímpicos en Londres Joel González, Nico García o Brigitte Yagüe, xunto a destacados atletas estranxeiros, que tamén buscarán puntos para o ránking WTF.


O torneo comezará o venres (08.00 horas) coa celebración do Open de España de técnica en cinco áreas de competicións, mentres que pola tarde (a partir das 15.00 horas) terá lugar a competición na modalidade de freestyle e a exhibición comezará ás 17.00 horas (en ambos casos con só dous tapices). O sábado será o momento para o torneo de combate das categorías cadete e júnior (a partir das 08.00 horas), mentres que o domingo (08.00 horas) será o día grande, xa que se celebrará o Open de España de Combate absoluto, na que están en xogo puntos para o ránking mundial. Para a celebración do combate disporanse oito tapices de competición con vídeo replay para as accións dubidosas.


Tamén hai que destacar que os afeccionados ao taekwondo que non estean no Pavillón Municipal, poderán seguir o torneo en directo a través da páxina web da Federación Galega de Taekwondo: www.taekwondogalego.com, con posibilidade de seguir os combates individualmente. A entrada ao recinto ten un custo de 5 euros por día (os menores de 14 anos non pagan).


O Open de España é a proba máis importante que se celebra en España neste deporte. Por iso, acoden taekwondistas de todo o mundo en busca de importantes puntos para o ránking mundial. Desta forma, entre os acreditados hai deportistas de case 50 países. Estes son os países acreditados: Albania, Alemaña, Andorra, Arxelia, Arxentina, Australia, Bahrein, Bélxica, Canadá, Corea del Sur, Croacia, Dinamarca, Exipto, Escocia, Eslovenia, Francia, Gabón, Gales, Gran Bretaña, Grecia, Hungría, Inglaterra, Irak, Irlanda, Italia, Kazakhstan, Costa de Marfil, República Checa, Lituania, Estados Unidos, Luxemburgo, Marrocos, Montenegro, Noruega, Países Baixos, Panamá, Perú, Polonia, Portugal, Porto Rico, Rusia, San Marino, Senegal, Suecia, Suíza, Turquía, Uzbekistán, Venezuela.


O alcalde Fernández Lores engadiu que a aposta do Concello maniféstase co pago dun canon de 80.000 euros (que agárdase recuperar parcialmente coas achegas dos hoteis) e indicou que estamos diante dunha aposta decidida por parte do Concello de Pontevedra e da Federación Galega de Taekwondo.


Agustín Fernández destacou que estamos diante da competición deportiva máis importante (en volume de participación) que ten acollido Pontevedra.

A repercusión económica, engadiu, será indubidable. De feito, xa están reservadas 379 habitacións de hotel en Pontevedra e Poio. Engadiu que a repercusión é tamén máxima para os deportistas locais, que teñen así ocasión de aprender dos mellores do mundo.


A capacidade organizativa de Pontevedra volve quedar así demostrada, explicou Juan Carlos Eiriz, quen mesmo bromeou dicindo que a Federación Española está preocupada diante das cifras deste evento “e xa lles demos todas as garantías, porque as cousas sempre saen ben en Pontevedra”.

Os mellores taekwondistas do mundo compiten no Open de España buscando praza para as...
Comentarios