lunes 10/5/21

O Concello amplía o dispositivo de seguridade do proceso de vacinación de FIMO

O concelleiro Germán Costoya lembrou que a Administración local dotou o pasado novembro á Agrupación de Voluntarios de Protección Civil (AVPC) de dúas carpas multiusos, que suman un total de 90 metros cadrados. 
vacunacion-fimo-ferrol

O Concello de Ferrol vén de ampliar o dispositivo especial de seguridade activado en FIMO con motivo do proceso de vacinación masiva que se está a desenvolver nas instalacións municipais. O concelleiro de Seguridade e Tráfico, Germán Costoya, indicou esta mañá que ás carpas xa instaladas a semana pasada sumáronse ote outras dúas hinchables e de maiores dimensións: o hospital de campaña e o posto de mando avanzado que o Concello adquiriu o pasado mes de novembro para a Agrupación de Voluntarios de Protección Civil (AVPC). O obxectivo é “mellorar con todos os medios posibles a atención aos nosos veciños nun proceso tan vital como o de vacinación”. Trátase do primeiro posto de mando avanzado e do primeiro hospital de campaña dos que dispón Ferrol, ambas carpas multiusos. 


Un total de 90 metros cadrados de carpa e 250 prazas de estacionamento 
O Concello adquiriunas para atender “calquera emerxencia ou situación que o requira”, explicou Costoya. A carpa hospital de campaña ten unha superficie de 60 metros cadrados e o posto de mando avanzado, 30, e agora en FIMO acolle varias cadeiras de rodas para as persoas que as necesiten. 

Con motivo do proceso de vacinación destes días, o Concello tamén habilitou un total de 250 prazas de estacionamento na explanada interior das dependencias municipais de FIMO, de libre uso para as persoas que asisten a poñer a vacina.

Servizo de acompañamento 
O Concello tamén activou un dispositivo especial para acompañar ás persoas que o necesiten ata o centro sanitario correspondente. A través da colaboración entre a AVPC e a Oficina municipal de Voluntariado púxose en marcha un plan de actuación co fin de facilitar en todo o posible o subministro de vacinas as persoas do municipio que presenten algunha dificultade para acudir á cita, como poden ser maiores, persoas con mobilidade reducida ou algunha discapacidade física ou cognitiva. Para solicitar esta asistencia pódese chamar ao número de teléfono de Protección Civil 981 320 000. 

Comentarios